Dolorès

M. Gilbert Dji vos-è prîye, Nicole ! C’n’èst nén l’momint… Nos d’vons trouvér ène solucion au problin.me di
l’inspècteûr…
Melle Sophie Mins c’èst vo problin.me, çoula, mossieû Gilbert ! Nos n’avons rén a vîr la-d’dins, nous-autes !
M. Gilbert Dji n’seû nén si seûr qui ça, mi…
Robert Qwè c’qui vos v’lèz dîre, vous ?
M. Gilbert Tous lès chèques ont stî féts au nom d’l’èscole. I gn-a rén qui fét l’preûve qui nos n’astîs nén
d’acôrd tèrtous èchène pou z-ach’tér tout c’qu’a stî ach’tè !
Mme Nicole Vos-astèz an trin d’nos dîre qui nos-astons tèrtous èmantchîs dins toutes cès èmantchures-la ?
M. Gilbert Qui vos l’voulîz ou nén !
Robert Bén d-è v’la yène asteûre !
M. Gilbert Nos-astons tèrtous dins l’min.me batia ! Et i nos faut trouvér au pus râde ène solucion… èyèt
divant d’mwin au matin pou bén fé !
Melle Sophie Vous qu’èst si malén d’abutude pou traficotér lès comptes, f’yèz toûrnér vo cèrvèle pou d-è
trouvér yène di solucion !
Robert Nos dalons tèrtous fini nos djoûs an prijon !
Mme Nicole Ô vous, ça va ! La tèreûr ! En’ vènèz nén co avou tous vos plans catastrofes ! Nos dalons cachî
tèrtous èchène après ène solucion mirake !
Melle Sophie C’èst ça… Et nos l’trouv’rons ! Min.me s’i faut passér toute èl niût !
(Ils s’asseyent autour de la table, se prennent la tête entre les mains, coudes sur la tables, et réfléchissent)
Melle Sophie On poureut quéqu’fîye dîre qui l’èscole è-st-an quarantin.ne !
M. Gilbert Trop taurd ! Robert âreut d’vu li d-è pârlér au télèfone t’t-a-l’eûre si c’èsteut l’vré !
Mme Nicole Choûtèz, on poureut putète li dîre tout simplumint qui madame Michèl n’èst nén la, qu’i r’vèn.ne
pus taurd… in-aute djoû ?
M. Gilbert Ca li chèn’reut drole ! Non fét, ça l’mèt’reut dins dès mwéchès disposicions, dji pinse…
Melle Sophie El tchokî dins lès montéyes ?
Robert Scroqueûs èt assazins au d’zeû du martchî ! I n’manqu’reut pus qu’ça !
Mme Nicole On done dès-idéyes, nous-autes, a l’place di fé dalér s’langue ! C’èst toudis mieus qu’rén !
M. Gilbert Nos n’dalons nén nos disputér, si vous plét !
Melle Sophie Et si on li dijeut qu’tous lès liârds ont stî scrotès ? Qui nos-avons stî victime d’in hold-up’ !
Robert Et on vos d’mand’ra si vos-avèz pôrtè plinte a l’police… Et qwè c’qui vos rèspondrèz a çoula ?
Melle Sophie Dji n’sé nén… Mins c’èst trop malauji, savèz ! On n’trouv’ra jamés pont d’solucions !
M. Gilbert Vos lèyèz tchér lès bras ? Dèdja ?
Robert Nos dalons fini a l’piyole !
Mme Nicole Vos l’avèz d’dja dit !
M. Gilbert I nos d’meure pus qu’a nos trouvér in boun-avocat !
Mme Nicole Qué n-afêre ! Mins qué n-afêre ! Quand dji pinse qui vos l’pèrdîz pou in-imposteûr…
Robert In-imposteûr… In-imposteûr… Bén, lè v’la l’idéye, c’è-st-in imposteûr qu’i nos faureut… Ou pus
râde ène impostrice !
Mme Nicole Imposteûr, c’è-st-in nom qui n’a pont d’féminin !
14