4 You-th #4 Beursalen

18
4 you-th magazine | página
Artista Shartella Santiago di Art Is My Life:
“Sigui bo instinto i hasi bo deseo realidat!”
> Shartella Santiago ta un artista, ku ta traha diferente tipo di
arte, mundialmente konosí. Pa esunnan ku konosé Shartella for di
chikí esaki sigur lo no ta un sorpresa. For di su 8 aña ya e tabata
pinta, kose paña (entre otro pa grupo di Karnaval) i hasi otro
tipo di obra di man. Tambe e tabata partisipá i gana premio den
kompetenshanan di pintamentu. Banda di esaki Shartella tabata
soña di bira un artista i e tabata sigui vários kurso riba tereno
di obra di man i arte, ku su mama tabata enkurash’ é pa hasi.
Despues di tempu Shartella a terminá na
Akademia di Moda (Mode Vakschool) na
Kòrsou. Remarkabel tabata ku pa bo drenta
e Akademia bo mester a sigui un estudio na
nivel mas haltu ku Shartella tabatin. Pero e
maestro di skol a keda asina impreshoná ku
tur loke Shartella ya a traha na e diferente
kurso ku el a sigui, ku el a disidí di dun’é e
chèns pa drenta e Akademia.
Ora ku Shartella tabatin 17 aña el a bai
Hulanda ku e intenshon di pasa su fakansi
ei, pero a resultá ku el a keda biba aya. Na
Hulanda el a sigui studia na diferente Akademia
di Moda, el a hasi un kurso di ‘Sierlasser’
(8 dia) i un estudio di Smet (1 aña i mei);
tur sobra akshon ku el a tuma tabata basa
riba su propio talento i kreatividat. Banda
di esaki el a sigui un estudio di ‘Visagie’ i
el a traha den teatronan grandi hasiendo
makiyahe.
E echo ku Shartella ta e úniko hende muhé
den mundu ku ta ehersé e tipo di arte aki,
pues ‘Sierlasser’ i Smet, el a bira asina famá
ku asta a traha un busto di dje ku ta pará na
Kiev, Ukrania. I e manera kon el a kuminsá na
e kurso di Smet kisas ta ainda mas remarkabel.
Na un evento sosial e maestro ku ta duna
e kurso di Smet tabata presente. Den kombersashon
el a bisa e maestro ku e tambe
por hasi e forma di arte ei. E maestro no
tabata di akuerdo; pues Shartela a kuminsá
sigui e kurso pa demonstr’é lo kontrario, ya
ku e si tabata asina konvensí ku e por.
Mirando bèk riba su karera artístiko Shartella
ta konsehá hóbennan ku lo kier sigui
un karera profeshonal riba tereno di arte pa:
“sigui bo instinto/deseo, i hasi bo deseo bira
realidat; paso ta abo so por hasi esei. Skucha
bo mes!” E karakter impulsivo, motivá, determiná
i ku perseveransha i un deseo propio di
Shartella, a hib’é kaminda e ta awe.
Despues di a biba na Europa (Hulanda i Bèlgika)
pa 26 aña el a bolbe bèk su isla natal.
Aworakí e tin su propio negoshi ku ta bende
entre otro prenda ku e mes a traha, pero
tambe otro tipo di arte. Banda di esaki e ta
tuma tareanan spesífiko tambe serka kliente.
I e ta representá Kòrsou den kompetenshanan
den eksterior. Su ambishonnan ta grandi
i den futuro sigur nos por spera mas di Shartella
Santiago, pues keda pendiente!
NÒMBER:
Shartella Santiago
FISHI:
Artista riba tereno di smet, prenda, pintamentu,
makiyahe, ‘body paint’ i modelahe
E-MAIL:
shatten8@hotmail.com
SELULAR:
695-8335
> Shurminia Martina-Rafaël (30), nasé na Kòrsou,
kasá ku Jonathan Martina, tin dos yu Joshua i Shelomi.
E ta un eks miembro di hefe di redakshon di
4You-th Magazine i aktualmente trahando komo ‘PR
en Communicatie medewerker’ na Stichting voor
Gehandicapten- en Revalidatiezorg (SGR-groep).
E ta un persona amabel i ta sintié bon ora e por yuda
un persona bai dilanti. E ta respetá hende i ta spera
tambe di haña rèspèt. E gusta ta den ambiente
sosial, pero den grupo chikí. E gusta hari i e ta hopi
kreativo. E ta un persona hopi spiritual. E ta kere ku
ta danki Kristu Hesus e tin tur loke e mester.
Kiko bo gusta di bo trabou?
‘Mi trabou ta hopi amplio. Mi ta hasi hopi kos ku mi ta gusta. Loke
mas mi gusta di mi trabou ta pensa strategia kon pa hiba un mensahe
na un grupo di hende di forma ku nan ta komprondé korektamente i
asta nan por aktua danki na e mensahe aki. Mi gusta presentá dilanti
di públiko, i esei tambe ta algu ku mi trabou ta permití mi hasi ora
mi ta moderador òf ora mi presentá un programa di televishon.’
Dikon bo a skohe e profeshon?
‘Semper mi ta un hende ku ta gusta papia. Mi tabata gosa di
mira hendenan ku ta hasi trabou di relashonista públiko. Tempu
mi tabata mucha mi tabata papia hopi. Semper mi rapòrt tabata
bini ku anotashon ku mi ta papia hopi den klas. Aparentemente e
papiamentu hopi no tabata un di malu pa mi;mas bien e ta un don.
Komunikashon ta un don. Tantu di persona pa persona, pero tambe
pa bo por pensa kon pa komuniká ku un grupo. Pues e echo ku awe
mi ta un eksperto den komunikashon ta mas ku tur kos pasobra Dios
a duna mi e don ei.’
Kiko ta e kos ku bo a siña di tur e añanan ku bo a traha?
‘Mi a siña ku den bo trabou bo mester tin plaser. P’esei ta importante
pa skohe bo profeshon bon. Skohe algu ku abo ta gusta. Bo trabou
mester brinda satisfakshon riba tur tereno, no solamente e parti
finansiero. Kaminda ku bo ta sinti ku e ta pèrdè su grasia bo mes
mester hinka bida aden. M’a siña ku bo mester traha ku pashon.
Beibel ta bisa traha den bo trabou manera ta pa Dios bo ta traha.
Algu mas ku mi a siña ta: “Go the extra mile”. Laga bo hefe, bo
koleganan, bo klientenan sinti ku bo ta hasi tur loke ta den bo pa
duna bon servisio i ta produktivo. Sinembargo, no hasié pa hende
so, pero hasié pa bo mes. Reta bo mes, purba hasi kos ku nunka
promé bo a hasi, asina bo ta tene bo mes bei.’
Bo bida eskolar a kana sin problema?
‘Despues di kaba VWO na Radulphus College, sin nunka a keda
sinta. M’a bai studia na Hulanda. Ora mi mira bèk, kisas mi no
a pensa sufisiente promé mi a tuma e paso aki. Mi tabatin hopi
amiga na Hulanda i mi tabata mira esaki mi chèns pa bai i konos’é
mundu. Anto ademas, mi ker a hasi algu den PR i no tabatin un
estudio spesífiko aki na Kòrsou pa mi hasi. Na Hulanda ma bai hasi
un estudio hopi amplio. E promé dos añanan a bai bon, i mi a asta
haña mi “propedeuse”, pero mi no tabata gusta. Mi tabata sinti falta
di mi famia masha hopi mes. I mi no tabata haña sufisiente riba
tereno di PR i komunikashon. Mi a skohe pa regresá Kòrsou, ora mi a
tende di e studio na UNA, “Management Business Communication”.
Na 2010, despues di 6 aña ma finalisá mi estudio na UNA i m’a
optené un diploma di “Bachelor in Business Administration”.
0Ademas mi a bai kore stazje i despues mi a sigui traha. Mi a kasa
tambe durante mi periodo di estudio, pues hopi kos a sosodé pareu.
M’a tuma mas tempu di loke ma pensa riba mi estudio. Pero mirando
bèk esei a sali mi di bon, pasobra ma hasi un estudio i mientrastantu
m’a kue eksperensia relevante pa mi karera. Esei a yuda tambe ora
mi tabata solisitá.’
Ki mensahe bo tin pa tur hóben ku ta bai studia afó?
‘Algu ku mi a siña ta ”choose your battles wisely”. Si bo ta bai studia
afó bo mester ta sigur dikon bo ta hasié. Ya asina ora problema
presentá bo no ta bèk, pasobra bo a skohe konsiente pa bai e
bataya. Puntra bo mes, e lucha aki ta bal e la pena? Ora bo bai
studia afó bo ta wòrdu konfrontá ku mundu. I hopi bia bo ke kue
mundu ku dos man. Kòrda ku no ta tur loke ta lombra ta oro. E tip
number 1: No bai tras di loke ta duna bo satisfakshon temporal, pero
buska un goso duradero. No gasta sèn pa loko, no keda sin bai lès
pasobra bo mester a bai un fiesta, skohe bo amistatnan konsiente
i si bo tin un namorado(a) laga boso relashon ta basá riba rèspèt,
amor i dominio propio. Anto nunka no ta di mas bisa ku Dios mester
ta na promé lugá den bo bida. Sin Dios nos no por logra nada. Ora
bo ta bo so bo no sa ki rumbo bo kue, no stèns riba hende, stèns
riba Dios!’
19
4 you-th magazine | página