3.001.01c devā́m̐ áchā dī - Linguistics

3.010.06c mahé vā́jāya dráviṇāya darśatáḥ ‖
3.010.07a ágne yájiṣṭho adhvaré devā́n devayaté yaja |
3.010.07c hótā mandró ví rājasy áti srídhaḥ ‖
3.010.08a sá naḥ pāvaka dīdihi dyumád asmé suvī́ryam |
3.010.08c bhávā stotṛ́bhyo ántamaḥ svastáye ‖
3.010.09a táṃ tvā víprā vipanyávo jāgṛvā́ṃsaḥ sám indhate |
3.010.09c havyavā́ham ámartyaṃ sahovṛ́dham ‖
(245)
3.011.01a agnír hótā puróhito 'dhvarásya vícarṣaṇiḥ |
3.011.01c sá veda yajñám ānuṣák ‖
3.011.02a sá havyavā́ḻ ámartya uśíg dūtáś cánohitaḥ |
3.011.02c agnír dhiyā́ sám ṛṇvati ‖
3.011.03a agnír dhiyā́ sá cetati ketúr yajñásya pūrvyáḥ |
3.011.03c árthaṃ hy àsya taráṇi ‖
3.011.04a agníṃ sūnúṃ sánaśrutaṃ sáhaso jātávedasam |
3.011.04c váhniṃ devā́ akṛṇvata ‖
3.011.05a ádābhyaḥ puraetā́ viśā́m agnír mā́nuṣīṇām |
3.011.05c tū́rṇī ráthaḥ sádā návaḥ ‖
3.011.06a sāhvā́n víśvā abhiyújaḥ krátur devā́nām ámṛktaḥ |
3.011.06c agnís tuvíśravastamaḥ ‖
3.011.07a abhí práyāṃsi vā́hasā dāśvā́m̐ aśnoti mártyaḥ |
3.011.07c kṣáyam pāvakáśociṣaḥ ‖
3.011.08a pári víśvāni súdhitāgnér aśyāma mánmabhiḥ |
3.011.08c víprāso jātávedasaḥ ‖
3.011.09a ágne víśvāni vā́ryā vā́jeṣu saniṣāmahe |
3.011.09c tvé devā́sa érire ‖
(246)
3.012.01a índrāgnī ā́ gataṃ sutáṃ gīrbhír nábho váreṇyam |
3.012.01c asyá pātaṃ dhiyéṣitā́ ‖
3.012.02a índrāgnī jaritúḥ sácā yajñó jigāti cétanaḥ |
3.012.02c ayā́ pātam imáṃ sutám ‖
3.012.03a índram agníṃ kavichádā yajñásya jūtyā́ vṛṇe |
3.012.03c tā́ sómasyehá tṛmpatām ‖
3.012.04a tośā́ vṛtraháṇā huve sajítvānā́parājitā |
3.012.04c indrāgnī́ vājasā́tamā ‖
3.012.05a prá vām arcanty ukthíno nīthāvído jaritā́raḥ |
3.012.05c índrāgnī íṣa ā́ vṛṇe ‖
3.012.06a índrāgnī navatím púro dāsápatnīr adhūnutam |
3.012.06c sākám ékena kármaṇā ‖
3.012.07a índrāgnī ápasas páry úpa prá yanti dhītáyaḥ |
3.012.07c ṛtásya pathy, ánu ‖
3.012.08a índrāgnī taviṣā́ṇi vāṃ sadhásthāni práyāṃsi ca |
3.012.08c yuvór aptū́ryaṃ hitám ‖