GRIND OG GRINDAHVALUR - Stovnurin

24
Í hesum døgum verða gjørdar royndir (frá 2002) við einum longri knívi, sum verður stungin beint
niður í nakkaholið, og í einum stingi verða mønan og hálsæðrarnar skornar av. Við tí nýggja
knívinum ber til at avlíva hvalin eftir 2-3 sekundum.
Sóknarongul - Tá ið djór skal verða avlívað, er sera týdningarmikið at halda djórinum so føstum, at
hvørki djórið ella knívurin gleppa av hondum. Til tað hava føroyingar frá fyrndini nýtt ein hvassan
sóknarongul, sum teir hava høgt niður í kúluna á hvalinum. Sóknarongulin verður ikki bara nýttur í
drápinum, men eisini tá ið teir deyðu hvalirnir verða drignir niðanfrá. Tað hevur verið dyggiliga
funnist at sóknaronglinum, av tí at hann særir hvalin. Hesi seinastu árini hava føroyingar gjørt ein
annan sóknarongul, sum er kubbutur og óhvassur. Hesin blásturongul særir ikki hvalin, men verður
settur niður í annan av teimum báðum seigu húðarposunum, sum liggja hvør sínumegin innanvert
við blástrið. Blásturongulin tykist at vera góður, við tað at hvalurin ikki ger so nógva mótstøðu, tá ið
hann verður drigin. Ein annar fyrimunur er, at hvalir, sum skuldu sloppið, eru ikki særdir.
12. mynd. Teir báðir sóknaronglarnir, blásturongulin høgrumegin.
Avlívingartíðin - kann verða býtt í tvey: 1) frá tí at høgt er í grindahvalin við gamla
sóknaronglinum ella tí nýggja blásturonglinum, 2) avlívingin sjálv. Samanlagda drápstíðin (Total
Killing Time) verður 1) + 2), tá ið sóknarongulin verður nýttur, men 2), tá ið blásturongulin verður
nýttur, júst tí at hvalirnir ikki verða særdir. Í 19 ymiskum grindum í árunum 1995-2000 hevur
drápstíðin verið tikin við stoppuri. Tá ið sóknarongulin varð nýttur, er drápstíðin í miðal: 65,8 ±
2,53 sekund, við eini spjaðing, sum er 3,5-290 sekund, og 50% av hvalunum vórðu dripnir í 55,5
sekund. Royndin við blásturonglinum stytti um miðaldrápstíðina: 29,0 ± 3,88 sekund, spjaðingina 6-
211 sekund, og 50% av hvalunum vórðu dripnir eftir 20,0 sekundum, sí talvurnar 5a og 5b og
myndirnar 13a og 13b.