PDF - Embann An Hirwaz

Mari
Feiz ’vad, ‘vid Ramzel n’eus ket kalz a arhant gantañ ive, med deh sur ne
oa ket ive. N’onn ket penaoz ‘devoa greet o hont. Eur billed a vil lur ‘m-oa roet
dezañ da lakaad eun overenn evid Piketez, ha se eo toud, koulz lavared.
Rosalie
‘Hanta, me ‘m-oa greet just ‘vel-se ive, rei mil lur da Golaig da lakaad eun
overenn. Ha koulskoude ar paour-kêz Piketez, pa oa beo, n’ee ket aliez d’an
overenn.
Mari
Nann ! Med marteze ‘n-eus muioh a ze a ezomm bremañ.
Rosalie
Añfin, añfin, lezom se evel-se.
Mari
Ya, rag me n’on ket deut amañ da zoursial deuz ar pez na zell ket ahanon.
Me ‘zo deut da lared dit dond emberr da noz da evañ eur bannah kafe, rag
mar gall Ramzel bezañ arru er gêr gand ar vilin nevez, eh a da vezañ greet eur
bannah “pur jus“. Keid zo ma ‘h on-me gand dour chikore dre ma oa torret ma
milin.
Rosalie
Biskoaz kemend-all ! Med penaoz az-toa greet da derri da vilin ?
Mari
N’eo ket me avad, med ma faotr-koz adarre ; sell amañ penaoz. Arru fall
‘oa e zent, ne oa ken evid chakad.
Rosalie
Med me ‘zoñje din justamant, te a chake dezañ peogwir ‘vez o lared :
« Mari du-mañ ’vez ordinal o chakad. »
Mari
Petra ? Me o chakad ? Digarez ‘mez d’ober ive aliez, med avad chakad
kreun dezañ ne rin ket, setu ‘n-eus tapet ar pleg da valañ e voued er vilin-gafe,
ken eo uzet he dent evel e reou ive.
Rosalie
Mad, mad. Tra-walh ‘teus laret. Amañ eo e vo ar hafe emberr. Ar gwele
nevez a vo red arozi anezañ a-raog mond e-barz.