Inhalt Ausgabe 54.indd - beim Hebelbund Lörrach

22
Dankesred für d Verleihig vom Hebel-Dank
Markus Manfred Jung, Wehr/Baden
Dankschön Herr Schmidt, dankschön im
Hebel-Bund für de Hebel-Dank. S isch e
großi Freud un Ehr für mi us viile Gründ.
Zum eine krieg i die Ehrig in minre wirkliche
Heimetstadt Lörrach. I bi z Zell gebore,
e Stückli Heimet. Un drum freut s mi bsunders,
dass zwei Zeller Trachtemaideli bi de
Überreichig däbii sin. Ich ha eui Tracht au
trage, früehner. Natürlich die vo de Buebe,
nit euri. Un s bisst mi no hüt, wenn i an dä
gruusig Filzschtoff denk. Aber hüt isch des
schiints anderscht un vor allem besser. I wohn z Wehr, siter 20 Johr, -e großis
Stuck Heimet, un schaff sit bal 25 Johr z Schopfe, au dört isch Heimet für mi.
Aber Lörrech, do chumm i her, do bin i däheim. Des spür i jedismool, wenn i
doo bi. 10 Johr Haagemerschtroß 60, am Stadion duss, in de Nordschtadt, un
däno Stette, am Buck, Obermattweg 11. Vor allem Stette, un dört de TuS, de TuS
Lörrach-Stette, d Liichtathlete, -doo sin die engschte Bindige gwachse.
Zum zweite krieg i die Ehrig vom Hebel-Bund, wo miini Eltere e mänggs freudig
Stündli hän verlebe dürfe un e Huffe Chraft drii gschteckt hän. De Vatter
bsunders, wo über ganz viil Johr d Läsigsreihe gschtaltet hät un mänkmool
au de Oobe doo, s Schatzchäschtli. Miine Eltre verdank i nit numme s Lebe,
vergelt s Gott, nei, au die erschte Begegnige mit em Hebel, vor allem mit siine
Gschichte us em Schatzchäschtli.
D Muetter hät wohl amig vorglese, de Vatter meh verzellt, usgschmückt,
Zwüschefrooge gschtellt: e Pädagog verschtoht halt e Pädagog, -un erzieht
zue Pädagoge. Mi Schwöschter isch Lehreri, mi Brueder hät in de Sozialarbet
agfange, ii bi Lehrer... Vor allem d Zundelheiner un Zundelfrieder-Gschichte si
mer blibe. Wie si d Lüt un sich gegesittig gföpplet un de Roti Dieter an de Nasen
ummegführt hän. Mine Eltre e bsunders liebe Dank, dir Mutti, un im Vatter,
wo jetz grad gwiiß dört oobe neumen e Virteli Markgröfler Guetedel sürpflet,
troche, un si Glas uf siini un unsi Gsundheit hebt. Gsundheit!