Würzburger Weihnachtsbüchlein 2011 - Stadt Würzburg

❆
Paradiesisch’s Gebabbl ufern
Würzburcher Weihnachdsmarkd
„Adam, horch, i muss d’r was sach!”
„Eva, sei schdill, i kanns nid verdrach,
wenn du mir mein Draum schdörsd vom Paradies,
des wecher deim Apfl verlore is!”
„Adam, i wess, mir isja selwer so bang,
weil der Wahn war so kurz un die Reu’ ewich lang.
So had des der Schiller vor langer Zeid g’sachd,
der bad’s a nid gegläbd, had sei Erfahrung selwer gemachd.”
„Seit unnerer Verdreiwung viele nei’s Unglück renne,
un immer wieder hilflos, verzweifeld laud flenne.
Eva, üwer 500 Jahr schdehn mir da an der Mariekabelle.
Was wars für a Elend allee um die Markdblatzschdelle!
Es Judevierdel ham se vorm Kabellebau ausradierd,
mid Hexewahn, Abgawe, …es Volk schiganierd.
Im Kriech 1945 ham Häuser gebrennd, gequalmd, g’schdunke,
un Mensche ham schreiend ken Wech aus der Höll’ g’funde.“
„Adam, manchmal mehn i, selwer da am Pranger z’ schdeh,
däde Fremde nit sach: „Sin die zwee awer schö”,
weil so kunsdvoll uns zwee der Riemeschneider modelierd,
des had unner Image scho a weng ufbolierd.
Awer Adam ehrli, i wolld di nid verführ un nid schdör,
i wolld sach, Gott konnd des Menschegejammer nix mehr hör’.
Beschdimmd had en desweche es Midleid gedrückd,
weil er uns wechem Apfl aus em Pardies nausg’schickd.
24
Mid Weihnachde wolld er der Weld neu Friede schenk’,
un Jesus sollerd die Mensche Richdung Paradies etz lenk,
dass se nid ner kämpfe, schdehle, lüche, raffe un neide,
eher helfe, verzeihe, sogar mit Feinden deile.
Des Erdelewe a mit Krankheide, Nadurkatasdrophe un Tod
verliered mid Liebe, Anschdand un Ärwerd an grausiger Nod.
Ufern Weihnachdsmarkd schdell i vo Jahr zu Jahr mehr fesd,
dass des Christeprogramm si nach 2000 Jahr a bissle umsetz lässd,
weil si Junge wie Alde da dreffe, lache un schdaune,
un einheimisch’s un fremd’s Gebabbel un Geraune
lässd a friedliche, harmonische, frohe Schdimmung erkenn,
kee Schdress, kee Chef, kee Ehe- un Nachbarstreit kann se nehm,“
„Eva, un wenn Kinnerauche schdrahle un Musik un Geklitzer no dabei,
falld em gladd des verlorene Paradies a weng ei.
✺
A grosse Weihnachdsschduwe möchd i den Markdplatz fasd nenn’,
wo alle si fühle wie endli derhem.
Gern däd i mir ganz vorsichdi Hoffnung mach’,
dass nach Weihnachde die Mensche wern nid wieder schwach.“
„Doch no lauern Wirtschafiskrieche, Druck, Raffgier, Depression,
es dörf doch nid sei, dass Menschlichkeid is nur Illusion.
Vielleichd könne Menscherechde un Demokratie no Friede forcier’,
unjed’s Jahr brauchd’s Weihnachde als Erinnerungsschubkraft dafür.“
Doris Alberth
25