LOS RESISTENTS DE JAN PETIT-QUI-DANÇA

LABARRACA - Conerias ! Colhonadas de mainadòts, tà passar lo temps ! ...Har petar
bombas ! Aquò, que cau har ! Tè, jo, que'n vau fóter ua a la prefèctura, a nueit ! ...
CLOVIS - Que'ns va har tots fusilhar, aqueth hilh de p ...!
ESTEVE - Cho ! Adara qu'i èm ! Que'u torna gahar ...e juste lo ser on Cassoret n'i ei pas ...
LABARRACA (de mei en mei violent) - E ua qui 'ac hasqui tot petar ! Que lo prefèct e'n
vadi shord !
ESTEVE - Vam, vam, docejar. Qu'atenderàs que lo "chef" e sija present entà préner ua
decision com aquera.
LABARRACA - E donc, qu'ei presa, la mia decision. Tu, qu'ès aquiu e tu, que remplaças lo
chef. Donc jo que me'n vau pausar ua bomba a la Prefectura. Arres ne m'arrestarà pas.
(que hè semblant de partir)
CLOVIS - Serafin, pensa a la toa prauba mair ...
LA BERNASHÒTA - E on l'as, aquera bomba, Serafin ? Vam, amuisha'm-la. Ne n'ei pas
jamei vist.
GABRIELA - Tè, jo tanben que serí plan curiosa de'n véder ua.
LABARRACA - Bombas ...bombas ...que ve'n poish trobar tant que volhitz !
ESTEVE (espiant l'òra) - Cho ! Cara'vs que v'ac prèi ! Qu'ei l'òra de la radiò. (Qu'aluca lo
pòste. Que hèn silenci. Musica. E la votz coneishuda ...)
LO PÒSTE - Aciu Radiò de l'Ombra. Los paisans parlan aus paisans. Escotatz quauques
messatges personaus :
-Lo hasan qu'aten las pastilhas tà la ganura.
-Arnaut e Jacolin, n'anitz pas a la hèira.
-Qu'ei lo moment de segar lo macaròni.
LA BERNASHÒTA - Tè ! ...Ne sabí pas que's segava, lo macaròni !
LOS AUTES - Cho !
LA VOTZ - Lo silenci qu'ei d'aur.
- Los guits que chaupatejan dens lo clòt.
- Lo vin que serà bon.
- A hum, ahumalhas ...
ESTEVE (dab fòrça gèstes) - Cho ! Escotatz !
(tots que's demoran cò-sec com petrifiats)
LA VOTZ - ...Tripas e castanhas,
Boharòc, còc, còc
30