LOS RESISTENTS DE JAN PETIT-QUI-DANÇA

LO BARON - Çò qui cau! çò qui cau!! E cretz poder gahar -Dab quauques vielhs fesilhs, los qui'ns volen panar!
- N'ei pas en segotir per la caravata -Qui van vader intelligents los nostes tecnocratas !
LABARRACA - Mes lavetz, que cau har : atender ...e har arren ?
LO BARON - Coratge e paciença, a tots qu'en va caler - Plegar com un vencilh, resistir, no cader !
Qu'ei l'òra, mon amic, de's bàter e de nhacar
De tiéner e de sarrar, lutar shens flaquejar.
(a tots) Víver au païs volem, non pas deishar la plaça
Aus qui'ns volen gahar com peish dens ua naça.
Doman, paisans, qu'auram navèth monde rurau
E que'vs perpausi a tots de ve'n balhar la clau !
GABRIELA (saunejant) - Un navèth monde rurau !
LABARRACA - E òc, mes que cau esperar que sija la bona clau tà poder entrar dens lo
vòste"navèth monde rurau". Pr'amor jo, qu'èi paur qu'agi hèra de monde qui demorin devant la
pòrta !
LO BARON - Aquò qu'ei la question. E qu'at cau díser plan :
E sabetz tots aciu, çò qu'ei d'estar paisan ?
(que s'espían tots, estonats. Que segueish)
Suu gran tròne assedut, l'Eternau enrabiat
Honhava a còp de pè los crums, esmaliciat.
" Qué son los mens paisan vaduts dens aqueth monde ?
Ce cridè au lugran, en jurant dab abonda.
E l'arcanjo agronòma aperat au burèu
Que devó explicar, gran vivant, au mei lèu
Aqueth aulor hastiau d'on vienè tan maishant.
- Meste, qu'ei lo lisièr, ce digó en baishant
Lo nas sus los esclòps, e plan embarrassat !
Com la cloca qui auré beròi cotèth trobat !
- Aquera n'ei pas l'auta ! A que'm sèrv d'embauchar
Ua tropa d'obrèrs qui non pòden empaishar
Tots aqueths mahutràs d'emposoa'm la tèrra ?
Qu'at van tot massacrar ! La natura sancèra !
E mon aiga tan blosa e mon èr tan leugèr !
Mes, miladiuvivant, e cau pèrder l'espèr
De'us véder plan gerar çò qui'us aví balhat ?
Quina raça esvariada ! A! Quin tropèth ingrat !
Que n'èi lo cap virat ! Dinc a mas praubas vacas
Que las hèn vàder hòlas, perdiu ! Quant de cohats
E's pèrden a la fin ! E n'an pas qu'ua lèi :
Rendament e profieit qui govèrnan com rei !
Adara que n'ia pro ! Que'n soi mort de chagrin !
Que va totun caler ana'n au gran camin :
Que voi har plaça neta e desbarrassa'm plan
Deus qui an desbrembat çò qu'ei d'estar paisan !
- Mes Senhor, digatz-me, quin ac vau desmesclar :
Los bons e los maishants ? ...Açò n'ei pas tròp clar !
- Per los peus de ma barba, engenhaire agronòma
32