LOS RESISTENTS DE JAN PETIT-QUI-DANÇA

ESTEVE (a tot doç) - Ne siatz pas tròp dur, totun ! ...
LO BARON VERD (a Estève) - Siatz donc rassegurat, n'èm pas inquisitors
E ne'us vam pas rostir sus lo huec a tot doç ! ...
( que presenta lo jurí) - Lo meste professor Van Delacrécelle
Deu mei gran Institut flamand de Bruxèlas.
- Her Doktòr Ludwig Azausitbramarlotau
De l'Universitat màger de Koenigsbrau.
- Un eminent scientific, el Doctor Juanin Bartissol
De la Calendreta Quandocalienta el Sol.
- Mèste Pandòre Cotelàs, lo noste grefièr.
- E enfin Sinhore Giovani Tagliatelli...
LABARRACA (qui'u copa sec) - Prego, no Sinhore ! Dottore ! Professore ! Comendattore!!
LO BARON - Scusa, si ! Comendattore Tagliatelli
De l'illustre institut roman Fiascòrelli .
MAURICI (esvariat, a Estève) - E ben ! Mila haut !
LO BARON - Entà esvitar tota irregularitat
Purmer que v'ac prèi, carta d'identitat !
(Maurici que sòrt la soa, empressat)
ESTEVE (qui hè un signe au Baron tà'u significar de no'n pas har tròp) - Que vau cercar la
mia. (que sòrt ua pausòta)
AZAUSIT....(a Maurici) Fou safez hapitude, fou, gome ça, trafailler dans le champ afec le
crafate ?!
MAURICI - Non...non, doctor ! Sonque lo dimenge ... Enfin que voi díser ...(Azaus. que'u hè
carar e qu'escriu quauquarren sus un carnetòt. Clovis, entertant qui verifica la carta
d'identitat d'Estève qui ei tornat)
LO BARON - Hèra plan ...Shens tardar que vam préner plaça.
Nosautes, per aciu ...E los dus, juste en faça.
(que s'installan autorn de la taula)
ROSETA (timidament) - Excusatz-me, professor, mes ...que'v volí demandar ...Enfin,
qu'acceptaratz de demorar tà minjar dab nos ? ...
LO BARON - No mes, n'ei pas possible ...ei ua plasenteria ?
N'ensajatz pas, atau, d'inflençar la frairia ? ...
ROSETA (mequejant) - Mes doctor ...enfin professor ...que volí juste saber quant ...
LO BARON - A ! Que v'ac prèi, Madama hètz donc drin de silenci
Que posquim enfin obrir nosta dòcta seença.
(Roseta, cap-baisha que se'n va asséder dens un cuenh)
40