06. Serat Centhini Jilid 06 (PDF) - Adjisaka.com

wau kang anèng ing wisma |
Ni sori Bayi Malarsih ||
114. Lawan kang putra sang ayu |
samya mêthuk maring laki |
tundhuk Nikèn Tambangraras |
mêndhak ingaras ngabêkti |
sumungku angraup pada |
Sèh Amongraga umèksi ||
115. Sarwi narik astanipun |
ngandika arum amanis |
ya wus yayi ngong-tarima |
payo tumamèng wismadi |
nulya kinèn nut ing raka |
kang rayi asta kinanthi ||
116. Kang rama lawan kang ibu |
ningali putra sarimbit |
bungah amarwata suta |
yata wau Kyai Bayi |
laju mring gandhok kang wetan |
de kang putra Amongragi ||
117. Laju mring panêpènipun |
ing tajug alit pawingking |
lèr-kilèn dalêm tan têbah |
balumbang kinubêng asri |
jinaro risig jêjantan |
kori lit ingukir rêmit ||
118. Kitri trênggulun ngrêguyung |
ngayomi natar arêsik |
kanan kering sêsêkaran |
kênanga gambir mêlathi |
kêtongkèng lan sêkar dangan |
sundêlmalêm mandhakaki ||
119. Cêpaka kalak lan mênur |
pacar anggrèkwulan asri |
argulo patramênggala |
taluki lan wora-wari |
puring kumuning andong bang |
tayuman noja saruni ||
120. Tinaman panêpènipun |
asimpar singub awingit |
wau sang ro pinangantyan |
rêna nèng panêpèn ninis |
ing srambining pamêlêngan |
Cênthini kang nglaladèni ||
121. Sumbaling ngaturkên wau |
dhêdharan saking bunèki |
< Serat Centhini Jilid 06 - Halaman : 115 >
Jilid 6 - Kaca : 86