06. Serat Centhini Jilid 06 (PDF) - Adjisaka.com

pan mukaranah kang dadi ||
137. Kawruhana sadayèku |
panjang cêndhake kang têsjid |
dènpratela kathahira |
patbêlas kalawan malih |
aksara winaca panjang |
pan pitulas kathahnèki ||
138. Mad lajim lapal lalinu |
tigang alip panjang sami |
êlè êlad panjangira |
sami lan alip kaping tri |
kèhing jabaring Patekah |
patangpuluh-nêm kèhnèki ||
139. êjère pan sangalikur |
êpèse pan amung nèm nil |
kalihlikur klimahira |
iku sunating awajib |
ingkang sampurnèng Patekah |
dadi gêr-ugêring pingil ||
140. Kang rayi nêmbah tur nuwun |
tumungkul kalangkung ajrih |
karahmatan mring kang raka |
kapasuk ing tyas anggusthi |
angèsthi saya waskitha |
tan cèwèt wulanging laki ||
141. Sangsaya mèntèr ing kalbu |
kabuka talabul ngèlmi |
brêsih jrênihi jinarwan |
raga tan suwalèng kapti |
sira Ki Sèh Amongraga |
ngandika ris payo yayi ||
142. Angambila toyèng wulu |
ing wêktu Ngasar mèh akir |
kang liningan nulya kadas |
wusnya samya toyastuti |
sarêng dènnya minggah salat |
sang ayu makmum ing laki ||
143. Bakda dènnya salat sampun |
wangsul gyan tata alinggih |
Sèh Mongraga angandika |
mring garwa wruhanta yayi |
ing sawising wêktu Ngasar |
mungguh caritaning Kadis ||
144. Tan kêna lamun aturu |
apan datan manpangati |
malah kiparat mêlarat |
suda ganjaran donya-kir |
< Serat Centhini Jilid 06 - Halaman : 118 >