06. Serat Centhini Jilid 06 (PDF) - Adjisaka.com

dadi paraboting repot ||
14. Lah tutura wong tuwa kang mau-mau |
iwak êndhog kinèn nyirik |
suwiwi pupu bêrutu |
myang iwak jêrowan sami |
iku pakolèhe awon ||
15. Kayata wong wus sêpta kulinanipun |
êndhog jrowan dèndoyani |
besuk tuwanya glis lampus |
gujih kaya bocah bayi |
kèh repot lara kuwayon ||
16. Aku kiye suwe-suwe dadi tutur |
mring sira ya Buyut Bayi |
eyangmu canggah rumuhun |
kasiyate marang mami |
tutur bisik-bisik alon ||
17. Kinèn mangan iwake sêlira pêrlu |
lan iwak landhak dènasring |
tuture paedahipun |
iwak sêlira binukti |
tuwin ngumure tan repot ||
18. Dene iwak landhak iku pedahipun |
sugih anak jalu èstri |
lan santosa purusipun |
miwah balung kulit daging |
yèn waras oto tan repot ||
19. Kyai Bayi manthuk matur nuwun-nuwun |
hêng hêng mêkatên kyai |
ulam sêlira puniku |
punapa tan karam ngèlmi |
yèn landhak kalal kemawon ||
20. Kyai Buyut Wanahita lingira rum |
êmbuh kalal karamnèki |
lagi tuture puniku |
wong tuwa amêsiati |
têgêg ora anggon-anggon ||
21. Kyai Bayi kaluhuran sabda sêpuh |
andhêku kalangkung ajrih |
kojah paedah ginugu |
Kyai Bayi Panurtèki |
matur mring Ki Buyut alon ||
22. Kula nuwun apuntên sampeyan maklum |
kula sarat angecani |
ingkang pra wayah sadarum |
supaya rahab abukti |
< Serat Centhini Jilid 06 - Halaman : 67 >
Jilid 6 - Kaca : 50