06. Serat Centhini Jilid 06 (PDF) - Adjisaka.com

tuwuk sadaya punang wong ||
77. Wus linorod rampadan luwaran sampun |
nulya dhadharan sumaji |
kang dadi palagumantung |
palakasimpar mêpêki |
lah-olahan ingkang raos ||
78. Gugurihan manis-manis sadaya wus |
sumaos anèng ing ngarsi |
yata ing wanci wus dalu |
Sèh Mongraga matur aris |
mring sang ibu sarwi anor ||
79. Lamun parêng kawula nunuwun maklum |
iktikap tangat ing masjid |
punika mèh wêktu sakur |
sêdhêng toyastuti trêtip |
kuwatos kalamun êpot ||
80. Ni Malarsih nauri wuwusira rum |
inggih sumangga ing kapti |
munajad maring Hyang Agung |
kula ajrih anggondhèli |
yèn wus mung bakda kemawon ||
8 III. Sèh Amongraga mêjang ngèlmu agami
Sèh Amongraga nyuwun pamit badhe solat ing mêsjid. Sasampunipun wudlu,
lajêng dhatêng ing tajug solat sunat sukril wudlu, sunat tahiyatul masjid, sunat
kiparat 12 rakangat sadaya kathi tartib, wêkasan maos slawat, nindakakên
wirid, sadaya kanthi khusus bêblês dumugi ing raosipun, jumbuhipun sêmbah
lan puji, nalangsa nyuwun pangapura dhatêng Pangeran. Lajêng andêdonga
sukur dhatêng Allah tuwin Rasul. Wêkdal lingsir, kondur.
Kaca 56 - 58
359 Mêgatruh
81. Mugi nuntên kundur sareya tilam-rum |
awajib ing garwanèki |
parluning pangantèn pangguh |
kêdah ing ratri mor guling |
matur inggih Mongraga nor ||
82. Wus linilan Mongraga lumampah mêtu |
sarwi gampare cinangking |
kang ibu suka angungun |
mulat bêgjane kang siwi |
gêr sukure mring Hyang Manon ||
83. Ki Sèh Amongraga mring patirtan adus |
wusnya suci nulya ngambil |
busananira rinasuk |
turuh kadas toyastuti |
ambanjêd agama kaot ||
< Serat Centhini Jilid 06 - Halaman : 74 >
Jilid 6 - Kaca : 56