06. Serat Centhini Jilid 06 (PDF) - Adjisaka.com

ya apêngal iku pêsthi |
nora kêna sinikara |
iku yayi wruhanira |
dene wujud nyatanira ||
45. Anane kita punika |
kalawan dating Hyang Suksma |
dene ngèlmu kang sanyata |
nyatane ngèlmu pan uni |
ya kalawan sipating Hyang |
dene nyataning kang ênur |
nyatane pan urip kita |
kalawan ya asmaning Hyang ||
46. Dene nyatane kang suhud |
nyataning pan ajal kita |
kalawan apêngaling Hyang |
wujud kita ya dating Hyang |
ngèlmu kita sipating Hyang |
ênur kita asmaning Hyang |
suhud kita apngaling Hyang |
iku yayi ingaranan ||
47. Wujud mokal jatinèka |
basa mokal iku yayi |
patêmon kawula Gusti |
iku mokal namanira |
datan Gusti tan kawula |
ya Gusti iya kawula |
Gusti kang sipat kawula |
kawula kang sipat Gusti ||
48. Yayi iya iku mokal |
gaibing roroning tunggal |
nora tunggal nora pisah |
tan kêkalih tan sajuga |
nora ewuh nora gampang |
loro-loroning atunggal |
iya ewuh iya gampang |
ananing Hyang wujud kita ||
49. Ikram kita wujuding Hyang |
iku wujud mokal rannya |
paguting kawula Gusti |
anèng jamaning akomplang |
plêng wêng-uwêng suwung gêmplung |
yèku mokal namanira |
sira yayi dènwaspada |
marang sajatining ora ||
50. Yèn wus bisa lobok yayi |
yèku wujuding nugraha |
wus mokale dhèwèkira |
mokal tan kênaning rusak |
urip tan kênaning pati |
< Serat Centhini Jilid 06 - Halaman : 280 >