Jendeaurreko debateak euskaraz - b08normalkuntza

Sarrera
Behin eta berriz aipatu ditugu diskurtso zuzena eta zehar diskurtsoa, hala ere,
ikerketa berri gehienetan bi estilook ez dira gramatiketan agertu ohi diren moduan
banatuta eta bi multzo definitu moduan aurkezten, continuum bateko sekuentzia
moduan baino. Egiturak beti ez dira “garbiak”: testu unitate baten estilo bat baino
gehiago ager daiteke (esate baterako, ahozko sarrera faltsuen ondorioz), aipu bakarrean
estilo biak egon daitezke (“Gorkak esan du Mikelek esan diola bihar euria egingo du”),
“esan dugun moduan...” erakoak eta abar. Alabaina, uste dugu aipuak continuum
horretan mutur batetik edo bestetik hurbilago lerratu ditzakegula, eta bide horretatik, gu
saiatu gara estilo zuzena eta zehar estiloa bereizten. Egitura horien arteko
desberdintasunak forma, erabilera zein funtzioa kontuan hartuz azalduko ditugu, eta
gramatikak eskaintzen ez dizkigun irizpide orokor batzuk finkatzen ere saiatu gara;
hainbat mailatako irizpideak: hasi prosodiatik eta dialektologiara.
Esan berri dugu debatean bestearen iritziak zein hitzak jasotzea ezinbestekoa dela
eta horretarako baliabide oso egokia dela diskurtso erreferitua. Baliabide hori
aukeratzerakoan beste arrazoi bi ere izan ditugu kontuan: alde batetik, lehen aipatu
dugun moduan, gure corpuseko subjektuen izaera —gaztetxoak 3 dira eta, hortaz,
helduek baino esperientzia kultural eta sozial txikiagoa dute—; eta beste aldetik, gure
ikerlanaren guraria etorkizunean debatearen irakaskuntzarako baliagarria izan daitekeen
azterketa egitea da. Hori horrela, kontzientea eta markatua den bestea kontuan hartzeko
bideak aztertzea interesatzen zaigu bereziki.
Lehenago ere esan dugu gure azterketarako testu enpirikoak erabili ditugula.
Sarrera honen lehen lerroetan esan dugu Bronckartek (1996) hizkuntzaren azterketa
testu enpirikoetatik abiatuta egin behar dela esaten duela. Guk halaxe egin dugu (gure
corpusa eta horren tratamendurako erabilitako baliabideak 4. kapituluan deskribatu
ditugu) eta bi modutako ekoizpenak jaso ditugu.
3 Gaztetxo deituko ditugu lan honetan 12-14 urteko nerabeak.
23