Jendeaurreko debateak euskaraz - b08normalkuntza

Sarrera
Hala ere, esperientzia aberasgarriak ez zuen muineko arazoa konpontzen:
azterketa egiteko corpus gabe gaztetxoen debaterik gabe jarraitzen genuen. Hainbat
aukeraren inguruan gogoeta egin genuen, gogoeta horren joanean telebistatik bilduak
genituen bost debateren aurreazterketa egin genuen, eta konturatu ginen ekoizpen
horiek bai betetzen zituztela guk eskatutako gutxienekoak, hala, digitalizatzea eta
transkribatzea erabaki genuen. Debate horiek ETBn emititu ziren “Hori da arrazoia”
saioaren barruan, 12-14 urte arteko gaztetxoek parte hartzen dute eta Joxe Felipe
Auzmendik aurkeztu eta gidatzen du.
Behin corpusa erabaki, bildu eta transkribatuta eta azterketarako unitatea mugatuta
—diskurtso erreferitua— horren inguruko hainbat galdera planteatu genituen eta horiei
erantzunak emateko hainbat osagai behatu eta aztertu ditugu (5. eta 6. kapitulua). Beste
ezer baino lehen argitu gura dugu, lan honen hainbat adibidetan —edota
transkripzioetan— ikus daitekeen moduan, gaztetxoek beti ez dituztela euskararen
gramatika arauak errespetatzen. Komunztadura, konkordantzia... arazoak han eta
hemen ikus daitezke, baita esperoko ez genukeen erregistro eta lexikoaren erabilera ere:
erdal kalkoak, egoera ez-formalei dagozkien berbak... Nahiz eta datu zehatzik ez izan,
susma genezake egoera sozio-linguistiko oso desberdinetan hazitako gaztetxoak direla,
batzuek estandarra erabiltzen dute euren jardunean, beste askok, ostera, euskalki bat
edo beste.
Lan honetan gure helburua ez da arauaren edota estandarraren erabileraren
baloraziorik egitea, ez dugu euskalkia aldaera gisa hartu eta ez ditugu aintzat hartu
oraintxe aipatu ditugun arau-hausteak. Gure helburua diskurtsibo-pragmatikoa da eta
helburu horrekin zuzentasun ebaluazioak ez dira nahitaezkoak. Esate baterako, (2) eta
(3) adibideak ekoitzi dituzten gaztetxoek ez dute euskararen gramatika araua betetzen,
baina lortu dute bestearen hitzak berera ekartzea.
(2) AE bai / baina nire aitak telebista ikusten duela /
bestean egiten dut lan // eta esaten dut / ba zurekin hitz egin
behar dut // bai / bai // gero / gero // eta akabuan beti
gertatzen da ez dugula hitz egiten (HdA gurasoak: 24)
25