Download gratuito - Edizioni d'if

Lo patrone ch’avea buono iodizio
e sapea ca lo munno era ’mbrogliato
e de chelle foiute avette ’nnizio,
subbeto se fu bello contentato.
E chiammanno essa co’ Nota’ Frabizio
se concrudette llà lo parentato
e s’appontaie che po’, l’auta semmana,
s’abballasse e corresse la quintana.
XXX
Ma mentre se conzerta pe’ la danza
tornammo a chelle che se nne foiêro
pe’ farese vaiasse a re de Franza.
Ora chi penzarrà ’nfi’ dove iêro?
Chi ieze a la Chiazzetta e chi pe’ stanza
pigliaie la Caglientesca o lo Quartiero.
Vasta: ca pe’ lo primmo carnevale
tutte iêro a morire a lo spetale!
XXXI
Ma Carmosina no, pecché l’asciâro
quanno foiea ’mmiezo li scalandrone.
Perzò li ture buono le menâro
sempe a cuorpe de tùtere e sgrognune,
e abbascio la cantina la chiavâro,
che steze sempe ’ncoppa li cravune
commo a gatta foresta. Ma dirraggio
craie commo ’scette e de lo maretaggio.
Scompetura de lo secunno canto
39