vittime

More documents

Recommendations

Info

14 & GALLURA ANGLONA Anno XXIV n. 3 29 marzo 2016 s’iscravamentu ISCRAVAMENTU IN SARDU - Creja ‘e Santu Paule, in Olbia Chenapura Santa, 25 martu 2016 Unu salutu ‘e coro a tottus sos chi sezis in custa creja, istasero, pro ammentare sa passione, sa morte e s’iscravamentu de Zesù Gristu. Occ’annu bos aeddo in sardu e no in italianu. L’hat cherfitu don Gianni, chi m’hat precatu d’esserepo ieo su primu a comintzare. Lu ringratzio meta pro custu. A su comintzu no ippo sicuru, ma pustis mi so lassatu cumbinchere ch’in meta piaghere. E custu, non c’haio carchi riserva supra de sa la limba sarda in creja, anzis ne so unu cumbintu istimatore, ma solu ca non so abituatu a preicare in sardu. Infattis est sa prima via chi lu aco. Pro custu m’azis a iscusare si su sardu meu no est perfettu e si bos aeddo in su sardu chi appo semper aeddatu dae minore in sa idda mea, ch’est Luvula. Est s’unicu chi mi cunsentit d’esprimer menzus chi poto su pessamentu meu. E lu acco chin veru coro ca so’ cumbintu chi in carchi manera su sardu depat essere usatu vinzas in creja, in su modu e canno sa Creja lu permittit. E so’ cuntentu de aberrer sa janna a cust’usantzia. Bi provo, isperande de bi resessire. Intramus como chin animu dispostu in su misteriu profundu de custa Chenapura Santa: s’arcanu de su Izu ‘e Deus, Deus iss’e tottu, attu omine, chi dat sa vita sua pro amore de tottus sos omines, de donzunu ‘e nois. Sa ruche est sa morte prus crudele e dolorosa chi bi potet aere, una morte riservata a sos prus delinquentes de sos omines, sa morte prus irgonzosa. “Nissunu - at natu una via Zesù Gristu – cheret prus vene a unu frate, a un amicu, de chie pro s’amicu e’ su frate dat sa vita sua!” Custa, duncas, sa rejone e su coro de s’arcanu chi oje ammentamus: S’AMORE ‘E ZESU’ GRI- STU PRO NOIS! Un’argumentu, custu, ch’est su coro, sa vena de su credinzu nostru, de su Vanzelu e de sa sarvesa nostra. Un argumentu chi su Papa ha cherfitu proponnere occ’annu pro su jubileu istraordinariu de “sa Misericordia”. Sa Pasca de occ’annu, duncas, et custu ritu de s’Iscravamentu los cherimus celebrare chin sos ocros e chin su coro dinnantis a custa veritate chi nos dat cossolu e isperantzia. E no est un unu misteriu inventatu dae sos omines, no est una vantasia… Est un’istoria vera! Su ch’istasera e in tottu custa Chita Santa ammentamus e celebramus est capitatu abberu! Sa cundenna ‘e Zesusu, sos corfos de vrusta, sa corona de ispina, sos craos c’ana trapassatu sa carre via de su Segnore son tottu veros. A distantzia de duamizza annos nois sichimus a nos dimannare: ma proite? Proite su Segnore hat fattu custu? Proite s‘est cherfitu abbassare goi in bassu? Non b’aiat atteros modos e maneras pro nos sarvare? Isse it Deus, soveranu e poderosu! Potiat ischirriare milli atteras maneras. Proite? Credo chi su motivu siat fatzile: achennesi omine, su Izzu ‘e Deus s’ata abbrazzatu tottu de s’umanitate, hat cherfitu chi nois l’aeremus intesu accurzu, hat cherfitu isperimentare donzi sentimentu e colare donzi esperientzia umana, vinzas sa prus crudele e umiliante, s’est cherfitu garrigare in palas suas donzi pesus umanu, achennenos videre in pedde sua chi isse nos cumprennet canno suffrimus, canno semus in peleas mannas e minores. Ca l’hat provatu isse ’e tottu! Amicos e frates meos, istasero in sa Via Crucis e in s’Iscravamentu, comente in tottu sa Chita Santa, nois non semus ispettatores indifferentes de vronte a s’arcanu chi ammentamus e celebramus. Semus attores protagonistas. In su chi capitat a Zesù Gristu bi semus nois puru in intro. Su chi Isse hat fattu e suffritu est pro tottus sos omines, est pro nois, pro donzunu ‘e nois! Est unu misteriu pro nois, un arcanu chi nos appartenet e de cust’arcanu amus bisonzu! Duncas, bos preco: lassatebos, anzis, totu cantos nos devimus lassare interrogare, nos devimus lassare ponner in mesu, piccare a manu tenta dae su Segnore, pro cumprennere ite Isse nos cheret narrere, ite nos cheret dare, pro nos lassare imbolicare dae su letholu de s’amore suo! Leghende su Vanzelu, cantas vias vidimus Zesusu chi accurtziat sos poveros, sos malaidos, sos bisonzosos. A cantos tzecos hat torratu sa vista, cantos thoppos hat fattu caminare, cantos lebbrosos hat sanatu, cantos peccatores hat perdonatu! Non s’est mai lassatu conditzionare (irviare) dae sa mentalitate tzeca de sos omines e dae su naronzu de sa zente: est intratu e hat mannicatu in domo de sos peccatores, hat datu a mannicare a 5 miza pessones chi l’annaiana in fattu, hat accurziatu e perdonatu sas prostituitas, at torratu a bita sos mortos. Non b’at appitu conditziones umanas de dolore e de sufferentzia in umbe non siat intratu chin paraulas e vainas de cunfortu e de isperantzia. Si Zesusu tottu custu hat fattu in terra, si sa passione e sa morte sono su disvelamentu de sa misericordia sua, l’hat fattu pro nois e solu pro nois: pro nos dare sa possibilitate de intrare in s’oceanu immensu de s’amore suo, pro esseremus nutritos e thathatos de sa misericordia sua, ma vintzas pro nos imparare chi nois puru devimus fachere su mantessi, nois puru devimus perdonare, nois puru devimus cherrer vene a su prossimu. “Devites essere misericordiosos coment’est misericordiosu su Babbu ostru Divinu” nos hat natu Zesù Gristu. In su Babbu nostru precamus donzi die: “Perdona a nois sos peccados nostros comente nois ateros perdonamus sos inimigos nostros”. Su Vanzelu de Santu Matheu nos narat chi Zesusu prima de sa Passione sua in su Monte ‘e sas Olias ha precatu chin sas paraulas de su salmu 136. Salmu e paraulas chi vintzas nois precamus: “Eterna est sa misericordia sua”. Chin custas paraulas Zesusu, preparannesi a sa passione e a sa morte, ponet s’umanitate sua in manos de su Babbu Divinu misericordiosu e ne cantat sa grandesa. Poi, pacos momentos prima de ispirare in supra e’ sa ruche narat: “Perdona, o Babbu, a sos chi m’ana cundennatu innoztente, ca non ischini mancu su chi achene”. S’urtima paraula, duncas, est paraula de perdonu, de dolu, de amore, de misericordia. Cale impreu pro nois! No est possibile chi cust’impreu nos lasset indifferentes, chi non cumbincat a nois puru a perdonare comente isse hat perdonatu, a cherrer vene a frates, amicos, connoschentes, omines de accurtzu e de lontanu, ma vinzas a chie nos at offesu, a chie nos hat inzugliatu, a chie nos cheret male. Custa, amicos e frates caros, est sa differentzia tra unu cristianu e unu chi non bi credet: sa vortza de perdonare, de semenare pache e cuncordia, de vraicare una sotzietate prena de amistade e de bonu cherrer, inumbe s’unu azuat a s’ateru e chie at de prus non zirat sa cara a s’ater’ala canno videt unu poveru, unu chi hat bisonzu. Si nos ziramus intunnu, si leghimus sos giornales, si abaitamus sa televisione vidimus solu zente briande, solu malu achere e gherras, vidimus su maritu chi occhiet sa muzere, sa mama chi occhiet su izu, su izu chi occhiet su babbu e sa mama. Ma non bastat. Vidimus zente chi occhiet in lumene ‘e Deus, e chin su lumen de Deus in bucca isconcat omines, eminas e pitzinnos innotzentes… Restamus chene paraula, istentamus a credere chi custas cosas potan sutzedere abberu. Eppuru sutzedini! E comente! Est sa crudele veritate de donzi tempus e puru de su tempus nostru! Ma propiu pro custu Zesù Gristu s’est fattu omine, pro custu est mortu in sa ruche: pro nos imparare s’amore, sa pache, su perdonu, pro sanare e cumbertire su coro malaidu e malintragnatu de s’omine. Pro chi s’omine non restet prejoneri de s’egoismu, de su malu pessamentu e de su malu achere. Abbaitamus como sa Ruche, abbaitamus su Crutzifissu. Cussa Ruche pro nois no est prus signale de morte, de cundenna, de iscunfitta. Est imbetzes signale de vita, de luche, de isperantzia, de cunfortu. Si semus ruttos Isse nos azuat a nos arriccare, si semus in affannu e in pelea isse nos cossolat, si semus disanimatos nos cunfortat, si amus peccatu nos perdonat. Su Papa metas vias non at ammentatu: “Deus non s’istraccat mai de nos perdonare. Simmai semus nois chi nos istraccamus de li petire perdonu”. Dae sa Ruche venit sa Luche! Lassemonnos abbratzare e accumpanzare dae custa Luche.! In pedes de sa Ruche b’est sa Mama ‘e Zesusu e Mama nostra, Maria Santissima, Mama ‘e dolores ma vintzas Mama de isperantzia. Issa, chi sett’ispadas de dolore l’han trapassatu su coro, nos azuet a nos garrigare in palas nostras sas ruches de donzi die. Accurzu a Maria bi sono sas feminas chi semper sono istatas accurzu a Zesusu e l’han semper assìstitu e ascurtatu chin devotzione manna, Maria de Cleofa e Maria de Magdala. Bi son puru sos atteros dissipulos chi, perditu su timinzu chi los aiata aggantzatos mentras chi Zesusu it protzessatu, si achen corazzu e, mancari sian galu prenos de dubbios e de dimannas chene risposta, cheren istare accurzu a su Mastru issoro in su momentu de s’urtimu respiru suo in custa terra. Sono sas tres de vortaidie. Su Segnore chind’unu lamentu narat: “So sititu”. Sos sordatos romanos chind’una lantza l’accurtziana a lavras un pacu ‘e bambache chin achetu. E derettu incurvanne sa cara a terra e nanne “Tottu est cumpritu!”, ispìrata. Comente amus fattu cust’ortaidie in sa liturgia de sa Chenapura Santa, istamus assamuta unu mamentu e precamus intro ‘e coro nostru. (……) Como est arrivatu su momentu de dare una digna sepultura a Su Segnore, in sa tumba chi animas vonas l’han preparatu. In pedes de sa ruche b’est Zoseppe de Arimatea unu de sos dissipulos de Zesusu. Est su mere de unu cunzatu, accurtzu a su Calvariu, inumbe b’at una tumba buita iscavata in sa rocca, mai usata prima. In cussa tumba interrana su Segnore. Paris chin Zoseppe de Arimatea b’est vintzas Nicodemo, un ateru dissipulu de su Segnore, omine justu et de vonu coro. Zoseppe e Nicodemo, azuatos da ateros dissipulos, omines et feminas, achene cust’opera vona de ch’ acchirrare su corpus de Zesusu dae sa Ruche e de che l’interrare.
s’iscravamentu Anno XXIV n. 3 29 marzo 2016 & GALLURA ANGLONA 15 S’ISCRAVAMENTU Zoseppe e Nicodemo, accurtziatebos como a sa Ruche… Ingrenucatebos…adorate et precate intro ‘e coro ostru su Izzu ‘e Deus…. Pesatebonche, annate a dainnantis de sa Madonna, sa Mama ‘e Zesusu… Dimannate a Issa su permissu pro c’acchirrare dae sa ruche su Corpus santu de su Izu Divinu…. Pro vois est unu granne onore de poter astringhere in bratzos vostros cussu Corpus santu de Zesusu, chi Maria at partoritu. Issa, comente donzi mama, l’intennet comente carre de sa carre sua inumbe iscurret su mantessi sambene suo, sa mantessi vita sua. Como, torràte a bos accurtziare a sa Ruche… Ampilate in sas iscalas pro liberare su Corpus de Zesusu dae cussu patibulu ‘e linna. Controllate chi s’asca siat bene posta in sutta ‘e sos bratzos de Zesusu, …. Est s’asca chi poi bos ata a servire pro c’acchirrare su Corpus dae sa Ruche Como chizzìtenche sa corona de ispinas dae sa conca ‘e Zesusu: est sa corona chi sos sordatos romanos, achennesi beffa de su Re Divinu, l’ana postu in conca. Ammustratela a su populu, pro ch’isse puru potata abbaitare e venerare cust’istrumentu de dolore Vasatebòlla… Apporritela a sos dissipulos chi sono in terra Vasatebolla vois puru… … e como dàzila a sa Madonna, chinghennebila in conca. Ata a essere Issa a la gollire vene comente reliquia pretziosa, comente at semper gollitu in coro suo tottu sas paraulas de su Izzu suo. Issa l’ischiat chi prima o poi deviat arrivare cuss’ora chi Simeone in su tempiu l’aiat profetatu: “a tie, Maria, un’ispada t’at a trappassare su coro”. E como tue, Zoseppe de Arimatea, chìtzinche su crau dae sa manu destra de Su Segnore. Cantas vias chin cussa manu ha beneittu poveros, malaidos, peccatores, zente bisonzosa chi s’accurtziaiat a isse pro esser cossolata e azuata. Ammustra cussu crau a su popolu, chi vidat e ammentet sempere su c’at suffritu Zesusu pro nos cherrer vene. Vasa cussu crau e àchelu vasare vintzas a Nicodemo… Apporrilu a sos dissipulos chi sono in terra… Vasatelu vois puru… ….. e como dazilu a sas feminas chi lu presentana a sa Madonna, ponennelu in pedes suos. E como, tue, Nicodemo, chitzi su crau dae sa manu sinistra de Su Segnore…Canta zente at abbratzatu cussa manu, cantos pitzinnos at carignatu, cantas concas at toccatu pro las liberare dae donzi malu pessamentu e dae donzi malignitate… cantos poverittos e istropiatos chi s’ingrenuchiana pro dimannare perdonu e aggiutoriu at arritzatu … Vasa cussu crau e àchelu vasare vintzas a Zoseppe de Arimatea… Apporrilu a sos dissipulos chi sono in terra… Vasatelu vois puru… ….. e como dazilu a sas feminas chi lu presentana a sa Madonna, ponennelu in pedes suos. In su mentras chi Nicodemo mantenet s’ascha intunnu a su corpus de Zesusu, tue, Zoseppe de Arimatea, acchirra dae s’iscala Pòneti in pedes de su Crutzifissu e chìtzinche su crau c’hat trapassatu cussos pedes santos. Aiat natu vene su profeta Isaia: “Comente son bellos sos pedes de chie vàttut novas vonas”. E sas novas de Zesusu sono sa pache, s’armonia, sa zustissa, s’amore… Ammustra cussu crau a su popolu Vasalu… ….. e como dailu a sas feminas chi lu presentana a sa Madonna, ponennelu in pedes suos. Zoseppe de Arimatea, azuatu dae sos ateros dissipulos, acchìrranche como su Corpus Santu de Zesusu dae sa Ruche… Ammustrate cussu Corpus maltrattatu e chene vita a su Populu pro l’adorare Como accurtziatebos a Maria e presentateli su Corpus de su Izzu suo Divinu. In su dolore tuo, o Mama Santissima, b’est su dolore de donzi mama in custa terra, de chie li morit unu izu, de chie devet assistere unu izu malaidu, oppuru suffrit pro unu izu chi s’est perditu chin cumpanzias e istradas malas, sas istradas de su vissu, de su vinu, de sa droga, de su malu achere… Paret chi Issa nos siat nanne vintzas oje: “vois chi colates inoche, virmàtebos e appompiate: bi potet aere unu dolore prus mannu de custu?” No, non b’at dolore chi potat essere paragonatu a su dolore de una mama! Mama de su Vonu Caminu, accumpanza chin su vonu coro tuo tottu sas mamas chi sono in affannu e golli sas lacrimas de sos ocros e de su coro issoro. Ache chi non s’intennana mai solas. Cale tristura manna in cust’issena! Ma est galu prus triste pessare chi sa morte e passione ‘e Zesusu sichit a esser presente oje, comente a eris, in totu cussos chi sono irmenticatos dae sa sotzietate, in sos disoccupatos e in sos isfruttatos, in sas eminas chi morini pro s’egoismu de s’omine, in cussas chi sono obbricatas a benner sus corpus e s’anima issoro, in sos pitzinnos violentatos… Perdonannos, Segnore, si custa chenapura santa est semper presente vintzas in sa sotzietate de oje. Dàennos s’isperantzia e sa tzertesa chi Tue ses sa vita, ca tue as vintzu sa morte chin sa Resurretzione tua. Gai siat. E tantas gratzias a bois c’azis apitu sa passentzia ‘e m’ascurtare. Ateros annos menzus! - Como imbarate chi delicatesa su Corpus de Zesusu in sa lettèra preparata pro s’interru. ✠Sebastiano Sanguinetti
Page 1 and 2: & Periodico della Diocesi di Tempio
Page 3 and 4: giubileo Anno XXIV n. 3 29 marzo 20
Page 5 and 6: settimana santa Foto di Piero Deppe
Page 7 and 8: caritas Anno XXIV n. 3 29 marzo 201
Page 9 and 10: g i o r n a t a d e i c r e s i m a
Page 11 and 12: la maddalena Anno XXIV n. 3 29 marz
Page 13: spiritualità Anno XXIV n. 3 29 mar

vittime

Create successful ePaper yourself

Delete template?

Save as template?