DIE ONDERRIG VAN PROFESSIONELE PRAKTYK IN DIE ...

‘n professionele identiteit ontwikkel, maak dit dus deel van hulle “self” (Adams, et
al., 2006:63; Sürreya, 2004:intyds; Gregg & Magilvy, 2001:intyds) en is aan
Verpleging toegewyd. Die omgekeerde is ook waar, naamlik dat indien ‘n
professionele identiteit nie ontwikkel en geïnternaliseer word nie, sulke persone
nie aan Verpleging toegewyd sal wees of die waardes van Verpleging sal nakom
nie. Sulke persone sal Verpleging slegs as die uitvoer van roetine prosedures
sien (Ewens, 2003: 224; 226; Pask, 2003:170; Gregg & Magilvy, 2001:intyds).
Self-identifikasie met ‘n professie behels meer as net teoretiese en praktiese
kennis van die betrokke professie; dit behels ook die aanleer van die waardes en
norme van die professie (Adams, et al., 2006:56-57; Grainger & Bolan,
2006:intyds; Davies, 2002:intyds; Gregg, & Magilvy, 2001:intyds; Mellish &
Paton, 1999:107).
Die proses waardeur waardes en norme aangeleer word, verskil egter van hoe
teoretiese kennis aangeleer word, aangesien waardes, norme en houdings die
affektiewe domein van kennis raak. Indien onderrig ten opsigte van waardes,
norme en houding dus slegs op teoretiese vlak gedoen word, sal studente nie ‘n
professionele identiteit ontwikkel nie (Mogodi, Jooste & Botes, 2003:31, 35-36).
Die uitdaging wat dus aan lektrises gestel word, is om strategieë te ontwikkel om
die ontwikkeling van professionele identiteit te bevorder, soos om byvoorbeeld
interaktiewe onderrigmetodes te implementeer en studente doelgerig hieroor in
praktyk te onderrig (Grainger & Bolan, 2006:intyds; Sürreya, 2004:intyds; Davies,
2002:intyds).
Ontwikkeling van professionele identiteit verg blootstelling aan positiewe
rolmodelle in die praktyk (Adams, et al., 2006:57; Gregg, & Magilvy, 2001:intyds;
Mellish & Paton, 1999:107; Fagerberg, 2004:284). Die ontwikkeling van ‘n
professionele identiteit is nie gekoppel aan hoe lank ‘n studente in die praktyk
geplaas is nie, maar aan blootstelling van spesifieke insidente of gebeure wat
28