Doarpskompas januari 2023

Foarwurd
It is sawat heal desimber as ik dit skreau. Jannewaris 2023 as it
publisearre wurdt. Dan ha wy de Krystdagen en âld en nij wer
fierd. Mei famylje, freonen en kunde. Mei-elkoar weromsjen nei
al dat bard is yn 2022 en foarútsjen nei it kommende jier. Elts jier
hat syn skaad, syn fertriet en pine. Troch bygelyks it ferlies fan
in goeie freon, famyljelid of neiste. Of ien dy’t slim siik wurden
is. Hoe dreech en lestich it libben soms ek wêze kin, sykje dochs
dat sinnestrieltsje dat altyd wer efter de donkere wolken foar it
ljocht komt. It lok sit meastentiids yn it lytse en net it grutte. Hâld
moaie oantinkens by dy en sammelje se. Kreëarje in argyf. Meitsje
kiekjes en sla dy op. Skriuw op wat meimakkest yn it libben. Dan
bliuwt it bestean foar letter.
Dizze earste doarpskompas fan dit jier hat sa’t jim sjen kinne in
nije opmaak dy’t úttocht is troch Anke en mei oerlis mei de oare
leden fan de redaksje besluten is sa fierder troch te fieren. De skriuwende
redaksjeleden meitsje har mei foto’s derby mear kenber.
De kollumnisten hiene altyd al in foto. No de redaksje mochten
jim se al net kenne ek. Sa komt der in gesicht by.
Wolle jo de redaksje en it bestjoer en kolumnisten ek yn it echt
moetsje? Dan kin dat op 20 febrewaris om 20:00 yn de Mienskip.
Fierder ynfo oer opjaan op side 29.
De redaksje fan it Doarpskompas hat har wer bûgd oer goede
foarnimmens lykas se ek yn 2019 foar it jier 2020 dienen. De ienige
fan de redaksje fan doe dy’t der noch yn sit bin ik. Fierderop
lêze jim wat de redaksje fan hjoed foar eagen hat yn dit nije jier.
Lokkich hawwe wy dizze moanne al in nij redaksjelid wolkom hjitte
meien. It is Nell Pesman dy’t foar it desimbernûmer ynterviewd
waard oer har wurk mei Jin Shin Jyutsu. Har eigen earste bydrage
lêze jo yn dit blêd en giet oer de wurkwinkels (workshops) yn De
Smidte fan it doarp.
Redaksjelid Karen seach by de Buurtkamer dy’t alle wiken yn De
Mienskip is. In plak om elkoar te moetsjen en noflik in kopke kofje
mei-elkoar te drinken. Der is ek noch troch Annet ferfolch fan it
ferhaal oer de kabouters makke. Sy fersoarget dizze moanne ek
de pagina foar de bern.
Sels ha ik yn de gymnastiekhal fan Sanjes Sportpark sjoen by de
groep âlderen dy’t ûnder lieding fan Ankie van der Vliet troch
oefenings sa fit mooglik besykje te bliuwen. De wurdpuzzel is dizze
kear fan myn hân. En ha ik in wintersk villanelle gedicht skreaun
dêr’t de regels ‘Kuierjend troch hichten fan snie’ en ‘Ik leau dat ik it
noch nea sa waarm hie yn werhelle wurde’.
In soad lêswille en de beste winsken oan alle ynwenners fan
Feanwâlden en De Wâl.
Jaap van der Laan
3