Lyd og musikk - Nysgjerrigper

Heksetreff i Blocksberg i Tyskland i 1669. ILL.: GV-PRESS
Tolv år gamle Maren Olufsdotter
unngjekk så vidt å bli brend levande
på bålet i Noregs verste hekseprosess
vinteren 1662–63. Barneheksene vart
kalla trollungar.
tekst: paul torvik nilsen
Under hekseprosessen i Noreg for omtrent
350 år sidan stod over 30 kvinner
og jentebarn skulda for trolldomskunst.
19 av trollkvinnene vart brende.
Maren slapp, men vart send i fengsel.
Svart magi
Dei såkalla heksene er menneske som
vart forfølgde, pinte og brende. Men
kvifor? Jau, trolldom vart rekna som
eit brotsverk, og menneska som vart
skulda for ei slik kriminell handling,
skulle straffast. Heksene måtte straffast
fordi folk trudde at dei var venner
med djevelen, at dei kunne skade andre
med magi, og at dei kunne ri på sopelimar,
geitebukkar eller andre dyr.
Dei yngste heksene
Siri Jørgensdotter var 13 år, og kom frå
Øyer i Gudbrandsdalen. Folk snakka
og sladra, og spreidde rykte om at ho
saman med mormor si først hadde
ridd på ryggen av ein sau, og seinare på
ryggen til faren, til heksetreff på Blåkollen.
Prestane brukte slikt snakk og
overtru til å misjonere for kristentrua.
Både sauen og faren døydde straks dei
kom tilbake derifrå. Ifølgje segna kom
det av heksekunst, svart magi og trolldom.
Siri unngjekk så vidt å bli offer
for ein hekseprosess hausten 1730.
Maren og Siri er blant dei yngste som
vart skulda for å vere hekser i Noreg,
etter det forskarane kjenner til.
Trollkvinner
Det var framleis heksejakt i Noreg for
300 år sidan. Forskarane har kome til
at 307 vart brende på bålet, flest fattige
kvinner, og oftast i Finnmark og i
Bergens-distriktet.
– Dei vart kalla trollkvinner. Det skal ha
vore kvinnene som lettast let seg friste og
lure av djevelens mange påfunn. Derfor
var det fleire kvinner enn menn blant
heksene, fortel Rune Blix Hagen, som
arbeider ved Universitetsbiblioteket i
Tromsø og har forska på hekser.
Heksejakt i dag
Du trudde kanskje at slikt berre er
eventyr, magi og overtru, eller at det
berre skjedde for forferdeleg lenge
sidan, i gamle dagar? Men nei, det føregår
heksejakt i våre dagar òg, blant
anna i Afrika.
– I Tanzania skal 5000 menneske ha
døydd som følgje av heksejakt mellom
1994 og 1998, fortel hekseforskaren.
Harry Potter
I Noreg i dag finst det sjølvsagt også
hekser, sjølv om dei er «utlendingar»:
Berre tenk på for eksempel Harry
Potter, Madam Mim, Magica von Tryll
og fleire andre frå bøker, teikneseriar
og film. Natt til 1. mai er det Valborgsaftan,
og det største heksetreffet kvart
år føregår då.
– Dagens norske hekser er snille og
greie. Vi må smile og vere vennlege mot
dei, seier hekseforskar Rune Blix Hagen.
Maren Olufsdotter
Maren veks opp hos tanta, trollkvinna
Maritte Rasmusdotter, men er dotter
av heksa Maritte Andersdotter, som
vart brend rundt 1653–54.
Maren fortel at ho har møtt Satan, vore
på besøk i helvete og omskapt seg til
katt og kråke. Ho lærte det av Maritte
Rasmusdotter, og fekk djevelskapen inn
med øl. Saka blir anka til lagmannen,
etter at det er kravd dødsdom. Maren
blir dømd til tukthus i Bergen. Det såkalla
barnehuset i Bergen vart oppretta
i 1646. Maren gifta seg seinare i Vardø
og døydde rundt 1694.
nysgjerrigper – 4-2005, 12. årgang trollungar og heksejakt 29