na mesa con Cunqueiro - Consello da Cultura Galega

Cunqueiro,
pan e compango
A extraordinaria e poliédrica personalidade literaria
de Álvaro Cunqueiro (Mondoñedo, 1911-Vigo,
1981) merece especial atención máis alá da conmemoración
do seu centenario. Así o entendeu o
Consello da Cultura Galega ao deseñar, xunto con
outros importantes parceiros, un amplo programa de
actividades que han servir para repensar e difundir,
no camiño do 2011, a obra do noso gran fabulador.
Un dos focos da atención cunqueiriana tivo que
ver coa cociña e os saberes culinarios, co interese polos
fogóns e a súa circunstancia, coa divulgación e o
gozo do bo xantar; con todo o referido á preparación,
ao tratamento e á erudición verbo da multiplicación
do pan e do compango. Por algo don Álvaro, ao que
nada humano lle era alleo, falaba da cociña como
“ese espazo onde o home puxo máis imaxinación,
moita máis que na guerra, tanta como puido poñer
no amor e, sen dúbida, moitísima máis da que pon
na política”.