na mesa con Cunqueiro - Consello da Cultura Galega

Bo proveito, amigos
Amigo comensal... —agardo non pecar de exceso
de confianza chamándolle amigo, xa que demostra
selo cando se pon a ler estas palabras de introdución
sabendo, como sei, que só os amigos e poucos máis
se paran a ler os limiares, coñecedores de que non
son máis que un entretemento, un bocado fugaz, e
que as mellores talladas se atopan nas páxinas que
o seguen—, abriu vostede algunha vez un libro de
Álvaro Cunqueiro e achegouno ao nariz para esculcar
os seus cheiros máis profundos e secretos? Tanto
se xa o fixo como se non, convídoo a que o faga con
esta obriña que agora ten nas súas mans.
Abra este libro por calquera páxina e achégueo
delicadamente ao seu nariz, aspire profundamente os
seus aromas e busque na súa memoria eses recendos.
A que ole a literatura de Cunqueiro?
Se nesta experiencia sensorial só atopou aromas
a tinta e papel, as páxinas que veñen deseguido vanlle
abrir, seguro, un novo mundo de sensacións, sabores,
aromas e texturas, aquelas que saen do máis
profundo da imaxinación e dos sentimentos. Prepárese
para gozalos como nunca antes o fixo.