Trivnaðarkanningin - Føroya Pedagogfelag

43
Granskingardepilin fyri samfelagsmenning
Hyggja vit eftir muninum millum pedagogar og hjálparfólk, síggja vit aftur týðiliga, at
pedagogarnir meta kensluligu krøvini í arbeiðinum vera hægri enn hjálparfólkini meta
tey.
Serliga stórur munur er millum pedagogar og hjálparfólk, tá talan er um at koma í
kensluliga torførar støður, og um arbeiðið er kensluliga tyngjandi. Tá talan er um at
koma í kensluligar torførar støður, so hendir hetta oftari fyri pedagogar enn
hjálparfólk. Kanningin vísir, at ávikavist 28% og 11% av pedagogum og
hjálparfólkum siga seg altíð ella ofta koma í kensluliga torførar støður. Pedagogar
kenna arbeiðið oftari meira kensluliga tyngjandi enn hjálparfólk. Her er munurin
ávikavist 19% og 11% av pedagogum og hjálparfólkum, sum kenna arbeiðið
kensluliga tyngjandi. Munurin er ikki so stórur, tá talan er, um tey gerast rørd av
arbeiðinum, um tey muga goyma teirra kenslur, og um tey muga lata vera við at siga
sína hugsan.
Kanningin vísir, at ávikavist 12% og 9% av pedagogum og hjálparfólkum siga seg
altíð ella ofta verða rørd av arbeiðinum. Ávikavist 14% og 12% av pedagogum og
hjálparfólkum halda, at arbeiðið krevur, at tey altíð ella ofta muga goyma teirra
kenslur.
Tá talan er um at lata vera við at siga sína hugsan, vendir myndin. Her eru tað
hjálparfólk, sum oftari lata vera við at siga sína hugsan. Tølini vísa, at ávikavist 7% og
10% av pedagogum og hjálparfólkum siga seg altíð ella ofta muga lata vera við at siga
teirra hugsan.
Tað sigur kanska ikki so nógv í sjálvum sær, hvussu høgt starvsfólkini á dagstovnum
meta krøvini í arbeiðinum. Her eiga vit at meta tað saman við tí stuðli, sum
starvsfólkini hava “atgongd” til á teimum einstøku arbeiðsplássunum. Útbúgving,
supervisión og faklig “sparring” eru avgerandi faktorar, ið kunna linna um og hjálpa
starvsfólkunum at handfara hesi viðurskifti. Atgongd til førleikamenning og víðari
útbúgving eru heilt grundleggjandi. Harumframt gevur supervisión starvsfólkum høvi
at skifta orð um arbeiðið við fólk uttanífrá, og faklig sparring við nærmasta leiðara og
starvsfelagar gevur teimum høvi at tosa um arbeiðsviðurskifti í gerandisdegnum.
Hvussu starvsfólk á dagstovnum meta hesi viðurskifti, kanna vit gjøllari í partinum
um stuðul niðanfyri.