Հայաստանի Հանրապետության Տավուշի մարզի ձեռքբերումները ...

Տավուշ
Քաղաքակրթության հնագույն օջախներից մեկում, թավշյա
անտառների գրկում ու կարկաչուն գետերի հովիտներում
անհիշելի ժամանակներից ապրում է մարդու մի տեսակ, որ
կոփված պողպատի պես կարծր է արտաքուստ ու փափուկ՝ սրտում,
մարդու մի տեսակ, որի օջախի հյուրընկալ ջերմությունը վայելել են
ասորա-բաբելական առևտրական քարավաններն ու, որի մարտական
կանչից սառել է արյունը թշնամու երակներում:
Այստեղ` Տավուշի հնագույն հողում կողք-կողքի հաշտ ու խաղաղ
երկինք են խոյանում հեթանոսական մեհյանն ու գմբեթավոր եկեղեցին:
Այստեղ մարդը հաշտ է իր անցյալի ու ներկայի հետ: Հաշտ է ու հպարտ:
Այստեղ է հայն առաջին անգամ ամբողջականացրել իր օրենքներն
ու սերունդներին ավանդել առակների իմաստությունը: Այստեղ են
ստեղծվել ու պահպանվել մարդու մտքի ու ոգու զորության բազմաթիվ
կոթողներ, քաղաքակրթության և համայն մարդկության մշակութային
ժառանգության գլուխգործոցներ՝• ձեռագրեր, ասեղնագործ խաչքարեր ու
հոյակերտ եկեղեցիներ: Այս հողում է ասպատակված վանքից հալածված
վարդապետն իր աշակերտներին կրթել քարայր-դպրոցում: Այս հողում
է արշավանքից տուն դարձող Սպարապետը հայոց տնկել սրբազան
կաղնին, որ պիտի կանգուն մնար տասնհինգ դար:
Այստեղ է ապրում հայը, որ խոտ հնձելու և ոչխար լողացնելու
արանքում տապակվում է աշխարհի ցավերով, զմայլվում ու զարմանում