Swatch Group Gschäftsbricht 2012

28 Swatch Group – Gschäftsbricht 2012 – Uhrä und Schmuck
Tradition 7067 GMT in Wiiss- odr Rosagold
Diä ästhetisch Eleganz vo dere Uhr entspricht ihrere Bedienerfründlichkeit. En Drücker bi 10 Uhr uf de
Ghüüsflanke erlaubt die schnelli Korrektur vude Ziitzone, wo ufem nach 12 Uhr verschobnä Ziffereblatt
abgläse werde chan. Es zwoits, handguillochierts und bi 8 Uhr agordnets Ziffereblatt zeigt d’Referenzziit
deheime ah, ergänzt duren Tag / Nacht­Indikator bi 10 Uhr, sofort erkännbar dank sinä silbrige und
schwarze Hälftene.
Marine GMT 5857 in Edelstahl odr Rosagold
D’Kollektion Marine isch um es neuartigs GMT­Modell mit Edelstahl­ odr Rosagoldghüüs erwiiteret
wordä. Diä aktuell Ortsziit chan ade beide zentrale Zeiger abgläse werde. D’Referenzziit isch ufemne
Stundechreis bi 6 Uhr ersichtlich, ergänzt dur de 24­Stundä­Indikator bi 2 Uhr. Es Datumfänschter, wo
mit de Azeig vode Ortsziit synchronisiert isch, verstärcht de praktischi Aspekt vo dere Uhr. Ihres
Ziffereblatt isch mitemne Welle­Guillochis gschmückt, wobi das Motiv bim Stahlmodell uf versilbärtem
Gold, uf de Rosagoldversion uf schwarzem Rhodium usgfüärt isch. D’Stundächreis unterscheidet sich
dur römischi Ziffere für d’Referenz­ und arabischi Ziffere für d’Ortsziit vode aktuell igstellte Ziitzone.
Héritage Phases de lune rétrograde 8860 und 8861
Es neus Modell mit Mondphaseazeig beriicheret im Brichtsjahr d’Kollektion Héritage.
S’Automatikkaliber 586L vudem Ziitmässer ermöglichts, d’Wandlige vumne zum Ghüüs assortierte
Mond z’verfolge, während im Zentrum vum Ziffereblatt us guillochiertem Naturperlmutt d’Stundä und
Minutä azeigt werdit. S’vo blossem Aug nid sichtbare Gsicht vum Mond isch en augezwinkernde
Verwiis uf s’Markäzeiche vo Breguet: d’Pfleg vude chlinschte Details. Das Modell isch i verschiedene
Versione, mitemne gschweifte Fassghüüs us Rot­ odr Wiissgold sowie mit eifacher odr diamantbsetzter
Lünette, lieferbar.
Reine de Naples, Jubiläumssondermodell 8973
D’Minutärepetieruhr mit Schlagwärch im Verübergah lüütet jedi volli Stund mit zwoi drüümal
wiederholte Schläg; diä Funktion laht sich mitem Drücker bi 2 Uhr usschalte. Diä durä Spahirbode
sichtbari Geometrie vude Brügge, de Schwingphase und de Dekors verkörpret s’Bild vomne mediterrane
Gartepavillon und erinneret a die prächtige Residenze vode Caroline Murat. D’Lünette und de
Bandastoss sind mit 28 Brillantschliff­Diamante und 27 blaue Spahire bsetzt. S’Ziffereblatt us
versilbärtem Gold und de Höhering sind mit 233 Brillante und 303 blaue Saphire vu unterschiedlicher
Tönig usgfasst, wo füren feini Farbabstufig sorged.
Präsenz
Usstellige
Mit de Wanderusstellig «1810­1812, Breguet erfindet für eine Königin die erste Armbanduhr» hed
d’Markä ihri Visibilität uf internationaler Ebeni gsteigeret. Genf, Schanghai, Peking, New York, Las
Vegas, Paris, Tokio und Züri ghöred zude Städt, wo d’Aficionados vude Markä d’Usnahmestück hend
chönne entdecke, drunder die vollständig Kollektion Reine de Naples. Zude 200­Jahr­Fiir vude erschte
Armbanduhr hed Breguet usserdem en exklusive Alass für fascht drüühundert Gäscht us aller Welt im
Golf vu Neapel organisiert. En bescheideneri, abr unvergässlichi Abigsverastaltig hed in Aweseheit vo
Chunde und renommierte englische Journalischte im Nationalmuseum vude Wallace Collection in
London stattgfunde.
Breguet hed Chunde vu ihrere Boutique in Ginza zunere Usstellig über Kunsthandwärch und insbesonders
über d’Kameengravur iglade, wofür extra en Meister vu dem Fach nach Tokio greist isch.
D’Usstellig rund um diä alti Tradition vude Kameenschniiderei isch aschlüssend ide Breguet­Boutique
in Cannes präsentiert wordä, bevor si nach Porto Cervo uf Sardinie greist isch, wo en priviligierti
Gäschteschar s’Savoir­faire vude Manufaktur hend chönne bewundere. Spöter sind d’Chunde und
Mediäverträter in Hongkong zumne VIP­Abig iglade gsi, wosi s’Könne vomne Graveur vo Breguet i dere
Technik hend chönne verfolge.
In Jekaterinburg hed Breguet anere ussergwöhnliche Usstellig über d’Uhr Classique Hora Mundi als
Premiere in Russland d’Classique Hora Mundi Haute Joaillerie präsentiert.
In Singapur hed Breguet drüü Täg de Theme Silizium und Hochfrequenz gwidmet. Iflussriiche Mediä
und usgsuechte Kenner isch Glägeheit bote wordä, diä technologische Innovatione kennezlerne und
sich mit emne R&D­Spezialischt vude Manufaktur z’unterhalte.