Swatch Group Gschäftsbricht 2012

2 Swatch Group – Gschäftsbricht 2012 – S’Geleitwort vo dr Presidäntin
S’Geleitwort
vo dr Presidäntin
Sehr geehrti Dame und Herre
Liebi Mitaktionärinne und Mitaktionäre
Sie wondere sech vilicht, dass de Gschäftsbricht 2012 sehr vill
mit em driessigschte Geburtstag vo Swatch z’tue het. Alli Aktionärinne
und Aktionäre, fascht alli Schwiizer wie au veli Mönsche
i andere Länder wössed, dass Swatch 1983 gebore worde isch.
Und sie händ rächt: D’Marktiifüherig vo de Swatch e de Schwiiz,
d’Wedergebort vo de Schwiizer Uhreinduschtrie und de Beginn
vo de Erfolgsgschicht vo eusem Undernähme, das alles isch of e
März 1983 gfalle. Härzliche Glückwunsch zum Geburtstag,
Swatch!
Doch wie bi allne Gschichte git’s en Vorgschicht. Si het 1982
begonne. Im Novämber. In Texas. Und si het kei villverschprächende
Schtart gha.
Doch luege mer z’ersch emol of d’Gägewart: Swatch Group het
2012 en Bruttoomsatz vo acht Milliarde und 143 Millione Schwiizer
Franke realisiert, im Verglich zo 2011 en Schteigerig vo 14%
– ei Milliarde Franke meh als no im Vorjohr. 1982 isch en völlig
anderi Situation gsi. Die damoligi ASUAG het en Bruttoomsatz
vo einere Milliarde und 143 Millione Franke gha, es Minus vo meh
als 19% im Verglich zo 1981.
D’Schwiizer Uhreinduschtrie isch praktisch vor em Zämebroch
gschtande, eusi bewährte machanische Uhrwärch send zuenähmend
vo de billige elektronische Uhre us Japan verdrängt worde.
I dere Situation het öppis müesse undernoh wärde, zum d’Japaner
i ihrere eigete Liga – de Billiguhre – z’schloh. Damols isch i de
Schublade vo de ETA en Idee für es technischs Glanzschtück
gläge. D’Schwiizer Uhrebarone vo de damohlige Ziit send zwar
wenig begeischteret gsi, sich of das Gschäft mit gringem Prestige
iizloh. Dennoch isch es vilicht doch es Gschäft gsi. Mer het
sech also entschede, s’mit dem «Deng» z’versueche.
Doch ganz typisch schwiizerisch isch mer das Ganze langsam
aagange, mit Vorsecht und Bedacht. I de Schwiiz leit mer nid
eifach so mit Volldampf los. Au denn nid, wenn mer schtärbenschrank
isch – und d’Uhreinduschtrie, s’nationale Ushängeschild,
isch damols im Schtärbe gläge. Z’ersch werd also e Tescht
gmacht und gluegt, öb’s überhaupt fonktioniert. Mer schtellt es
paar Uhre här und beobachtet, wie si sich im Vertribsnetz vomne
amerikanische Partner in Texas verchaufe. Mer entwecklet en
Wärbekampagne für e günschtigi Uhr us Kunschtschtoff, bunt,
Swiss Made: D’Swatch, «the Swiss watch that knows life should
be an adventure. Strap It On!». S’Ergäbnis? En Flop!
Im Gägesatz zu hüt: Swatch Group het 2012 mit emne Betribsgwünn
vo einere Milliarde und 984 Millione Franke alles andere
als en Flop produziert. Das isch en Schteigerig vo nohzue 23%
gägenüber 2011. Im gliche Ziitruum het sech de Konzärngwünn
om 26% of ei Milliarde und 608 Millione Franke erhöht.
Nach de gängige Logik het’s es Projekt, wo en Flop isch, ned verdient,
wiiter verfolgt z’wärde. Bald emol send Näme vo Firmene
kursiert, wo mer d’Lizänz für d’Härschtellig vo dem onverchäufliche
«Dengs» het chönne verchaufe – denn würd mer mit dere
Gschicht wenigschtens en chline Batze verdiene. Chönne Sie
sech hüt en Swatch vorschtelle, wo nid vo de Swatch Group wär?
Doch mer muess sech s’Konzärnergäbnis vo 1982 vor Auge halte,
wo veli Johr und Aaschträngige schpöter d’Swatch Group wärde
sött: Es isch e Nettoverloscht vo meh als 156 Millione Franke gsi.
Zum Glück het sich doch eine gseit, wo damols als externe Beroter
gwürkt het, dass letschtlich die Vereinigte Schtaate und vor
allem Texas für sone provozierende und wetzige Gägeschtand
vilicht nid de vorteilhaftischt Ort gsi isch – e Gägeschtand, wo
meh fun als billig gsi isch, es kreativs Augezwenkere, fräch, en
uffälligi Erschiinig i de Wält vom Massekonsum. De einti het sich
sälber und anderne gseit, dass mer marketingtechnisch vilicht
nid alles gmacht het, wo mer hätt müsse mache, um de amerikanischi
Teschtlauf zumne Erfolg z’mache. Dass es echli absurd gsi
isch, in Texas en Uhr wölle z’verchaufe, wo det keine kennt het,
während mer i de Schwiiz scho devo ghört het, sie aber nid het
chönne chaufe. Und er het druf beschtande, z’ersch i de Schwiiz,
denn en Düütschland und Ängland en neue Versuech z’schtarte
und dasmol alli mögleche zor Verfüegig schtehende Kommunikationsmittel
z’notze. Ebe: Undernähmergeischt!
Er isch en Mönsch mit Intuition gsi, er het us em Buuch entschede
und het Heruseforderige gliebt, er het sech vo keine Konventione
loh ufhalte. Und er isch en begnadete Kommunikator gsi. Doch
vor allem isch er es Arbeitstier gsi, er het Idee gha und het si
beharrlech omgsetzt. Eigentli hätt mer’s chönne vorusgseh, und
er het’s vorusgseh: Was de Texaner nid gfalle het, isch vo de
Schwiizer, denn vo de Düütsche, de Italiäner und Franzose, vo
Frau und Maa, vo Jong und Alt liideschaftlech gliebt worde. Die
zwöiti Uhr, the Second Watch, d’Swatch isch definitiv lanciert
gsi! Das Undernähme, wo d’Schwiizer Uhreinduschtrie verkörperet,
het äntli de Erfolg gfiiret, wo ehm set langem gfählt het. Mit
vill Engagement, Innovation, Idee und Träum, riichlich Emotione
und onghürem Arbeitsiisatz isch’s weder of d’Bei cho und isch zo
dem worde, was es hüt isch. Es wiist en operativi Marge vo meh
als 25% sowie en Eigekapitalquote vo über 83% uf und het nohzue
30 000 Beschäftigti, devo meh als d’Hälfti i de Schwiiz. S’Undernähme
het hüt e Finanzchraft, wo so wechtigi Akquisitione
erlaubt wie Aafang 2013 de Chauf vo de exklusive Schmock­ und
Uhremarke Harry Winston.
I eusem Gschäftsbricht 2012 fende Sie driessg legendäri Swatch­
Uhre, zum die jungi Erwachseni z’fiire. Und wer weiss, öb si nid
bald weder überrascht mit sensationelle Innovatione?
Für d’Schwiizer Läserinne und Läser haltet de Gschäftsbricht e
wiiteri Überraschig bereit: De Gschäftsbricht in Schwiizerdüütsch!
Mer wänd eusi schtarch Identifikation mit eusem Land