Kirchgemeinde SchwerpunKt gemeinde - aktuelle Ausgabe

Editorial | Schwerpunkt | Gemeinde | Kirchgemeinde | Aktuell | Publireportage
Ds Linnebänkli
Vor es paar Jahr het üsi Gmiin ds Dorfzentrum nöi gstautet: me het d`Strass schön
gmacht, Bluemechäschte häre gstöut u mit ere 20 Stunnekilometer Beschränkig für
d`Outo e sogenannti Begägnigszone gschaffe.
U wüu me nid so rächt gwüsst het, wie me d`Dorflinne i das Ganze wott ibezieh,
het me für dä Fau e Kommission i ds Läbe grüeft, mit dr Ufgab, sech däre Sach
aznäh.
U was isch usecho? Schöni, verschiede grossi Granit-Stiine, u die het me – aus
gstauterisches Elemänt – dr Dorflinne uf d`Füess gstöut.
D`Begeischterig für die Kunscht het sech im Dorf i Gränze ghaute.
Es si Stimme lut worde, wo gfunne hii, we me de d`Chüuche scho nid im Dorf higi,
für was me de ächt dr Friedhof zmittsdrinn sött ha?
Es isch gsi, wie scho mengisch: Usgrüeft isch hurti e Huufe! Aber de bruchts geng
öpper, wo das Usgrüef zämebüschelet u öppis drus macht. Settigs artet, wie me wiis, o gärn i organisiere u wärche us, u das
isch bekanntlech nid jedermas Sach.
Aber jitz si äbe d`Bänklimacher i Aktion trätte. Me wiis us aute Büecher, dass um die Dorflinne um isch es Bänkli gsi; im
Luuf vo de Jahr sogar i verschiedene Versione.
U so nes Bänkli het me – zmitts ir Begägnigszone – umi wöue mache.
D`Gmiin het grüens Liecht gäh, dass me die Stiine het dörfe absage u aus Socku für ds Bänkli neu setze. Ds Houz isch organisiert
worde, u am ene Samschtig hii 4 Manne die Sitze kunschtgerächt montiert.
Die ganzi Umgstautig het natürlech o ihre Priis. U das wo mer jitz dörfe säge, erfüut üs aui, wo da i irgend ere Form mitgmacht
hii, mit grossem Stouz u mit äbeso viu Früüd: Wo mer d`Lüt hii afa frage, ob sie würde mithäufe, üsi Idee vom Bänkli
finanzieu z`unnerstütze, hets ganz
viu spontani u positivi Reaktione gä! U
mit em Betrag, wo so isch zäme cho,
hii mer das Projekt chönne verwürkleche.
(Es si übrigens o Aubliger u Guggischbärger
unner de Spender.)
Mier danke aune ganz härzlech, wo hii
ghoufe, dass mer umi es Bänkli hii um
d`Dorflinne um!
Mier si äbe doch no es rächts Dorf, wo
d`Lüt häufe, we me se brucht.
U jitz wünsche mier däm Bänkli ganz
viu zfrideni Lüt, wo druff absitze, chli
verwile u wär wiis, villich ergä sech
sogar gueti Begägnige i der Begägnigszone
z`Schwarzeburg.
D Bänklimacher
Rosmarie Vifian
Das Magazin von Schwarzenburg | N o 12 | Dezember 2010
11