90 minutas

Per la proxima generaziun
Ina casa da club sesaulza buca da sez ord la tiara. Da Flurin Bundi
Ils temps da turpetg e scuidonza ein vargai. Nos hosps e nos agens giugadurs ston buca pli sedisgustar
dils bulius ellas duschas. Nus havein in agen stadion che tarlischa exact aschia sco
quels dil Principadi da Liechtenstein. Ei dat denton duas differenzas impurtontas denter noss’arena
e quellas dalla bassa. Primo, nies stadion ei esteticamein ina steila el firmament dils plazs da
ballapei. Secondo, nus havein baghegiau cun atgnas forzas nossa casa dil club. Naven da Domat
entochen Balzers eis ei usit da planisar in niev edifeci, da scriver ora las lavurs e da schar
baghegiar el dallas fatschentas che offereschan il pli favoreivel. Pagau vegnan tals projects lura
cun daners d’in singul sponsur grond ni dil cantun. Buca aschia a Crap Gries! Naturalmein che nus
duvrein era sustegn finanzial d’ordvart. La Surselva senoda denton buca els daners. Perquei havein
nus priu enta maun sez la caussa.
La via naven dalla naschientscha sur la planisaziun e realisaziun entochen tier l’avertura da nies
niev da casa ei stada liunga e carpusa. Ella ha pretendiu suadetsch e perseveronza, cunzun da entginas
creaturas sursilvanas. Quellas han numnadamein cumprovau il slogan «Survival of the Fittest»
da Charles Darwin. Ils pli adattai individis survivan. Gian Arpagaus, Marcus Büchler, Simon Lutz,
Armin Casutt, Beat Dermont, Remo Caderas, Bruno Wellinger, Reto Camenisch e Jan Berni han surviviu.
Els ein umens capavels cun ferma postura e cun tgaus pli stinai che stinai. Els han contrahau,
sescagnau, fatg pasch, mediau, legiu las levitas in a l’auter per lu puspei anflar in cumpromiss.
Mintgin dad els enconuscha l’endretga via co ins baghegia in stadion a Crap Gries, mo che lur prioritads
ein buca adina las medemas. In ei dil meini ch’ins stoppi far adatg dallas finanzas, tschel
tema per l’estetica, ferton ch’in auter vul aunc integrar quei e tschei schnicschnac, patratga lez
mo vid ils basegns pratics. Senza s’adattar surviva negin tals disputs duront varga dus onns. Els
han planisau, coordinau, dirigiu e motivau ils commembers dall’uniun per quei project unic.
Pertgei nos commembers ein noss’uniun ed els ein nos luvrers, buca mo per grillar in pèr ligiongias,
na era per baghegiar in stadion da ballapei. Babs da famiglia, dunnas da casa, giuvens
umens frestgs – tuts cun hobbys e mistregns e pauc temps liber – han suau uras en ed uras ora
per in project da cuminonza. Els han unfriu lur temps liber e lur inschign a favur dall’uniun.
Walter Cadosch da Schluein ei caulingia tier la Viafier retica e procura cun lavurs da manteniment
ch’ils trens possien da tutt’aura entochen sisum la Surselva. Tiels fideivels voluntaris da Schluein
s’audan era Roman Holderegger e Nicolaus Sgier. Sco contabilists ein els disai da luvrar cun
cefras e computers. Sil plazzal han els denton mussau ch’els san era ir entuorn cun uaffens pli
gronds. Patric Casutt da Falera (polier) e Sandro Bleuler da Ruschein (miradur) ein sedecidi da far
sururas enstagl da scher sin canapè suenter la lavur. Stephan Berni da Castrisch ei inschignier
da construcziun ed havess avunda stress cun ses projects da punts, senza aunc far quentadas per
ch’il tetg dall’arena nova tegni. Ronny Della Morte da Glion ei greenkeeper silla plazza da golf
ed ha mussau ch’el ha buca schau ir a piarder ses inschigns sco miradur. Randolf Bonolini da Castrisch
restaurescha normalmein truccas ed autras antiquitads en siu luvratori a Sagogn. Ei vegn
pretendiu ch’el hagi giu drizzau en ina sempla treglia sil plazzal duront la fasa da construcziun.
Ronny Panier da Sagogn lavura sco inschignier da maschinas per ina fatschenta giuvna alla Scola
polytecnica federala che sviluppescha dronas d’ina nova generaziun. Sias habilitads d’in Leonardo
da Vinci ein adina stadas beinvegnidas. Nina Berni da Castrisch ei quella che tschappa adina en
quei che sto aschia ni aschia vegnir fatg, per exempel preparar las tschaveras pil triep da luvrers
fomentai. Aluis Vinzens controllescha normalmein il betun da projects da baghegiar dil cantun
Grischun, nos mirs tegnan perquei franc enzacontas generaziuns da ballapeiists.
In’arena sco a Crap Gries sesaulza buca da sez ord la tiara. Perquei engraziein nus fetg a tut ils
voluntaris passiunai che han baghegiau nies niev da casa ed als sponsurs e las vischnauncas che
han sustegniu il project! Grazia era a tut ils partenaris e las famiglias per lur gronda pazienzia
e toleranza duront quei temps intensiv.