Itinerarios y Talleres - Agenda21escolar.barakaldo.org

2010-10-07. Berria
Olatuen energia ustiatzeko teknologiaren
lidergoa lortu nahi du Eusko Jaurlaritzak
Itsas energiaren nazioarteko adituak daude Bilbon egunotan, Itsas Energien
ICOE 2010 kongresuan
MIKEL CARRAMIÑANA.
Barakaldo
Iraganean arrantzarekin eta aurreko mendean ontzigintzarekin gertatu bezala, itsasoa
berriz ere «Euskadiren etorkizuna» bilakatzeari pozgarri deritzo Bernabe Unda Eusko
Jaurlaritzako Industria sailburuak. Energia berriztagarrien eremuan itsasoak, eta bereziki
olatuek eskaintzen dituzten aukerak ikertu eta garatzeko lasterketa teknologikoan
«Euskadik lidergoa lortzeko apustua» egin duela ziurtatu du Undak.
Bilbao Exhibition Center erakustazokan atzo abiatutako Itsas Energien ICOE 2010
kongresuaren atarian hitz egin zuen sailburuak. Euskal industriarekin elkarlanean, Araba,
Gipuzkoa eta Bizkaia «energia berriztagarrietan nazioarteko erreferentzia» bilakatu
daitekeela ziurtatu du, horretarako proiektuak, dagoeneko, martxan daudelako.
EEE Energiaren Euskal Erakundeak Armintzan (Bizkaia) eta Mutrikun (Gipuzkoa)
aurreikusitako proiektuak «estrategitzat» jo ditu Undak. Lehenengoa, Biscay Marine Energy
Platform (Bimep) deritzona, olatuetatik energia lortzeko ikerketa eta esperimentazio
zentroa izango da. Datorren urtearen amaieran jarriko dute martxan eta 20 milioi euroko
inbertsioa beharko du.
Mutrikuko portuan, berriz, hamasei turbogeneradore instalatzeko lanean ari dira, urtea
amaitu aurretik 300 kW-eko potentzia instalatzeko, 600 lagunek urtebetean kontsumitzen
duten beste. Jaurlaritzak itsas energia ustiatzeko teknologia egokia zein den ikertu eta
erabakitzeko azpiegiturak sustatu dituela gogorarazi du sailburuak.
Teknologiak dituen «erronkei» ere heldu die Xabier Biteri Iberdrola Renovableseko
kontseilari delegatuak BECen: «Itsasoaren energia erabiltzeko modua garatu behar dugu
eta, horretarako, erakunde publikoen laguntza beharrezkoa da».
Itsasoak, berez, «badauka mundu osoko energia eskaerari erantzuteko ahalmen teorikoa»
baina, gaur egun, energia hori lortzeko kostuak ez direla bideragarriak merkatuan uste du.
Ohiko energia iturriak baino hamar edo hogei aldiz garestiagoa da itsas energia lortzea,
«berriztagarrien aldean ere kostu handia dauka».
Europan, edonola ere, itsasoaren energia ustiatzeko «ahalmen handia» dago;
aurreikuspenen arabera, 2020. urterako 3,6 GW-eko potentzia lortuko da eta 188 GW
ingurukoa 2050erako. Ordurako, zuzeneko edo zeharkako 470.000 lanpostu sortuko ditu
itsas energiak Europako Batasunean.
Gamesa Nortropekin
Itsas sektorekoa da Gamesak AEBetako energia berriztagarrien merkatuetan zabaltzeko
egindako bazkide berria ere. Zamudion egoitza duen taldeak Northrop Grumman
enpresarekin elkarlanerako akordioa sinatu du. AEBetako ontzigile nagusia ez ezik,
defentsa sektoreko erraldoia da estatubatuarra. Bien artean, G11X-5,0 MW offshore
plataforma ezarriko dute Virginian 2012. urteko bukaeran. Gamesak turbinak jarriko ditu eta
Northropek instalatzeko azpiegiturak.
64