Préface et notes d'ANDRÉ BERRY 1930 - Université de Provence

Puta sembla leo d'aitan:
Fers es d'ergueill al comensan,
Mas pueis quan n'a fag son talan,
Tro que son mil, no·s prez' un gan.
Quar soven per putia
Put la metritz,
Cum fai per bocaria
Carnils poiritz.
En talant ai que vos decli
L'us de putana serpenti
Que pan' a l'auzel son pouzi;
E sab l'auzels s'ab leis s'afi,
Can l'a faita bauzia
De sos noiritz,
Aten com per leis sia
Mortz o delitz.
Eisamen qui sec son traï
Fai del ric putana frairi;
Quan n'a trag la bresch'e·l saï,
Li fai de la lengua bossi;
Ben es de gran folia
Sals e gueritz
Qui·s destol de sa via
Ans qu'ela·l fitz.
Putan'es de tan mal engenh
C'ab dous parlar cueill et asenh
Totz cels que pot metr' en congrenh;
Quan l'avers faill, de si·ls empenh;
Donx qui de sa paria
Es encobitz
Soven mud' e cambia
L'enfoletitz.
Puta per usatge·s defen
Al ric si grand loguier no·n pren;
Lai on l'arbalesta desten,
On sap lo pa e vi aten.
Molt fai gran glotonia
La trichairitz
Quan los pros lais' e tria
Los achaïtz.
3. ESTORNEL. (I)
Estornel, cueill ta volada:
Deman, ab la matinada,
Iras m'en un' encontrada
On cugei aver amia;
Trobaras
E veiras
Per que vas;
Comtar l'as
E·ill diras
En eis pas
Per que se traslia.