Préface et notes d'ANDRÉ BERRY 1930 - Université de Provence

Qu'anc no vi cors miels talhatz ni depens
Ad ops d'amar sia tan greus ni lens.
Tant am midons e la tenh car,
E tant la dopt e la reblan
Qu'anc de mi no·lh ausei parlar,
Ni re no·lh quier ni no·lh deman.
Pero ilh sap mon mal e ma dolor
E, quan li plai, fai mi ben et honor,
E quan li plai, ieu soferc me·n ab mens,
Per so c’a lieis no·n aveigna blastens.
S'ieu saubes la gent enquantar,
Miei enemic foran enfan,
Que ja us no saubra triar
Ni dir ren que·ns tornes a dan;
Adoncs sai ieu que vira la gensor
E sos belhs huelhs e sa fresca color,
E baizera·lh la boca en totz sens,
Si que d'un mes hi paregra lo sens.
Ben la volgra sola trobar,
Que dormis, o·n fezes semblan,
Per qu'ieu l'embles un dous baizar,
Pus no valh tan qu'ieu lo·lh deman.
Per Dieu, dona, pauc esplecham d'amor;
Vai se·n lo temps e perdem lo melhor;
Parlar degram ab cubertz entresens,
E pus no·ns val arditz, valgues nos gens.
Ben deuri' hom dona blasmar,
Quan trop vay son amic tarzan,
Que longa paraula d'amar
Es grans enueitz e par d'enjan,
Qu'amar pot hom e far semblan alhor,
E gen mentir lai on non a autor;
Bona domna, ab sol qu'amar mi dens,
Ja per mentir ieu no serai atens.
Messatgier, vai, e no me·n prezes mens,
S'ieu del anar vas midons suy temens.
Quant vey la lauzeta mover
De joi sas alas contral ray,
Que s'oblida e·s layssa cazer
Per la doussor qu'al cor li vai,
Ai! tan grans enveia m'en ve
De cui qu'eu veya jauzion!
Meravilhas ai, quar desse
Lo cor de dezirier no·m fon.
Ailas! tan cujava saber
D'amor, e tan petit en sai!
Quar eu d'amar no·m puesc tener
Celieys don ja pro non aurai;
Tout m'a mon cor e tout m'a se
E me mezeis e tot lo mon,
E quan si·m tolc, no·m laisset re
Mas dezirier e cor volon.