Préface et notes d'ANDRÉ BERRY 1930 - Université de Provence

Quant ieu la vey, be m'es parven
Als huelhs, al vis, a la color
Quar aissi tremble de paor
Cum fa la fuelha contra·l ven.
Non ai de sen per un efan,
Aissi sui d'amor entrepres;
E d'ome qu'es aissi conques,
Pot dompna aver almorna gran.
Bona domna, re no·us deman
Mas que·m prendatz per servidor,
Qu'ie·us servirai cum bo senhor,
Cossi que del guazardon m'an.
Ve·us m'al vostre comandamen,
Francx cors humils, gais e cortes;
Ors ni leos non etz vos ges,
Que·m aucizatz, s'a vos mi ren.
A mon Cortes, lai ont yhl es,
Tramet lo vers e ja no·l pes
Quar n'ai estat tan longamen.
3. CANZO.
Chantars no pot guaire valer
Si d'ins del cor no mov lo chans,
Ni chans no pot del cor mover,
Si no i es fin' amors coraus;
Per so es mos chantars cabaus;
Qu'en joy d'amor ai et enten
La boca, e'ls huels, e'l cor, e'l sen.
Ja Dieus no·m don' aquel poder
Que d'amar no·m prenda talans,
Quan ja re non sabri' aver,
Mas quascun jorn m'en vengues maus,
Tos temps n'aurai bon cor sivaus;
E n'ai molt mais de jauzimen,
Quar n'ai bon cor, e mi aten.
Amor blasmon per non saber
Fola gens, mas leys non es dans;
Qu'amors no pot ges decazer
Si non es amors cominaus;
Aquo non es amors aitaus,
Non a mais lo nom e'l parven
Que re non ama, si no pren.
S'ieu en volgues dire lo ver,
Ieu sai be de cui mov l'enjans;
D'aquellas qu' amon per aver,
E son mercadieiras venaus;
Mensongiers en fos ieu e faus!
Vertat en dic vilanamen,
E peza me, quar ieu no men.