Il Tabloid del festival Time in Jazz 2008

B’at una architettura chi s’isprimit cumpondzendhe a
istratos divessos elementos seberados cun campiana e
chi, de ‘orta in borta e postos unu subr’a s’atteru, dzenerant
unu palattu cumplessu chi podet ospitare mobilias
dae sas formas pulidas e dae sas linias nettas.
Custa at bisondzu de tempus e respondhet a sas esigentzias
de una geografia umana chi si medzorat modifichendhesi,
a bortas in presse e a bortas cun addaju,
pienendhe s’ispatziu boidu cun palattos invisibiles.
Sos materiales de costrutzione sunt sas ideas ei sas
linias architettonicas sunt sa summa de sas diversas
esperientzias chi, una in fattu a s’attera, cumponent una
trae longa e forte capatza de muntennere su pesu de su
tempus ei sas sulletzitatziones dettadas dae su chi sutzedit.
Architetturas sotziales? Architetturas viventes?
No b’at termine chi potat descriere in modu giustu. Ca
custas in sa realidade no esistint, ma nos piaghet de
creere chi appartenint a s’istoria de s’umanidade pius de
ondzi monumentu connottu e pius de ondzi logu simbolicu
de sa terra. Dae sas piramides a su Colosseu, dae sa
Tour Eiffel a su no-ispatziu de su Ground Zero de New
York.
Naturalmente semus faeddhendhe no de logos visibiles
a sos ojos de su mundhu ma de epicentros creativos in
gradu de dittare atterettantas architetturas, pertzepidas
gratzias a sos sensos ma chi faltant de una istruttura traditzionale,
ue sa pedra de s’angulu est sa tzente ei sos
muros de cuntenimentu sunt s’energia cullettiva.
Su pensamentu pius cuncretu andhat a sos logos de
s’arte chi sunt fora in logu abertu. A tzertos treatos de
s’Ottighentos, a sas arenas e a sos giardinos italianos,
ma ancora pius a sos logos ue sa casualidade de s’istoria
at dzeneradu una architettura noa in sinu a
s’architettura, Duncas no solu Ground Zero ma, unu tra
tottu, sa Cheja de Santa Maria dello Spasimo de
Palermo, in s’antigoriu rione de sa Kalsa, ue piantas
seculares de figu pigant, chena timoria peruna e intrepidas
de su logu, tra sos muros de s’antiga basiliga tendendhe
sos ramos a su chelu.
Una bovida chi no b’est rendhet s’istruttura lirica primma
chi architettonicamente incumpleta et est igue chi sa
manu de s’omine si sostituit a s’istoria sovrapponendhe
sos elementos esistentes cun ideas cuntemporaneas e
noas ma pius ancora cun visionariedade e poesia.
Si esistit duncas unu pensamentu de architettura collettiva
capatzu de costrutziones infinidas e invisibiles chi
s’accerant a chelu, de tzertu Time in Jazz est una de
custas. Ca in vinti annos at costruidu solu cun rena de
riu e cun ludzana disegnendhe s’istravagante forma de
unu palattu dae sas chentu istantzias fattu de atterettantas
jannas chi ponent in comunicazione grandes ispatzios
creativos.
Podimus contare subr’a fundhamentas robustas comente
su granitu biancu subra a su cale s’apposentat
‘Elchiddha ma contamus puru subra pedras tribagliadas
dae piccapedreris raffinados chi dant formas a bloccos
chi no sunt perfettamente isquadrados e chi sunt distintos
dae sinnos arcaicos chi ischint de ‘entu e de abba.
Comente sos trachites ei sos basaltos de sos nuraghes
chi pigant a su chelu antitzipendhe e sudzerendhe
s’aspiratzione de sas figos seculares de sa Cheja de
s’Ispasimu de Palermo.
E tandho no podiat mancare tra sos tantos temas de
Time in Jazz cussu subra s’architettura de sos ispatzios
e de sos sonos. Proitte dae sempre est istada su ‘eru elementu
sudzeridore de unu festival chi su tempus ei
Time in Jazz 2007: le Fresiadi
il festival
s’umanidade ant costruidu de die in die pondzendhe
pedras intagliadas, subrapondzendheche atteras pius
mannas, disegnendhe volumes e ricavendhe jannas
sempre abertas verso su nou.
Piramides o nuraghes? Turres altas o grattacielos?
Est in s’architettura de Bach o in sos incastros poliritmicos
de Steve Coleman chi amus a buscare sas rispostas?
Oppuru in sos jogos limbisticos de sos arcos e de
sos istrumentos de ottone? Oppuru ancora in sas performances
de sos artistas visivos o in sas riflessiones pius
cuncretas de sos beros architettos?
Ancora una ‘orta su misteriu est in su tribagliu imperfettu
de su piccapedreri. De chie lassat su signu o disegnat
cun una mirada progettendhe unu ponte invisibile
e immaginariu tra un’isola ei su mundhu. Sulzendhe sas
distantzias de sos mares e pienendhe s’ispatziu cun
immensos architraves.
3
Paolo Fresu