“Ul Feron de Ugion” - Comune di Oggiono

10
Fiera di Sant’Andrea 2011
“I Buteech de piazza Mercâ”
I diseven: “La piazza lè semper la piazza!”. E alura chi che “meteva sô butega” el dueva cercà un lucal propi lè. A
Ugion “La piazza” l’eva Piazza Mercâ o Piazza del munüment che, fina a pochi an fa, l’eva pröpi al centro. La piazza
l’eva circundada de “paracai” e de “banchel de sass”. L’è vera: e gheva anca “La Stazion”, “La Calchera”, “La Vetürina”
… ma quant se diseva: “La piazza”, se intendeva piazza Mercâ. Una vôlta e gh’eva anca una stazion de posta ,“La
Curuna”. Vüna anca in Calchera: i Longhi ,“Trattoria con stallazzo”. Dunca: i butec de Piazza Mercâ! Cumincemm
cunt la butega del “Dric”. Sôl canton cun via Mercato che, cume se diseva alura. el vendeva “i ciapp”. In butega la
sciura Caterina. Mario, ul bagai el fava ul curnisat e ul vedrie. Subet dopu vegneva “ul Spizie”. Ul “Leonardi”. Una vòlta
lé e gh’eva dent un Albergo. Sübet dopu e cuminciava ul giöc di bocc de “Pedron”. Una stradeta, un po püse d’un
sentê, la purtava in de la curt de l’usteria e pasando suta ul purtòn se rüava in via 1° Maggio. Sôl cantòn gh’eva e ghè
amò ul cancell de “Ignazia” che la vendeva ul ven. In de la cà che ades lè di Mauri, e gh’eva dent un mercant de stoff:
i Motta. Sò la strada, e gh’eva la “Trattoria Corona”: dü bei vecc, semper in urden e l’ usteria, cui mobel scür e i tapê
di taul a quadreton vert e negher. De part e gh’eva “ul Brusadell”, che l’eva amò “Paul Cartê”. Ul “Vittorioso” l’eva ul
giurnal che nomm bagai lengevem in cà, L’“Intrepido” e chi olter “fumetti”, Tex, Gim toro, Pantera bionda, i se lengeven
“de riscundòn”.
Dopu gh’eva la lateria de Bambina “Lacera”. I Aldeghi. Sübet dopu vegneva ul “Feramenta Vismara”e sôl canton cun
Via Lazzaretto se truava la pasticeria del “Delafonte”. Surbett, benis per i spusi, turti e past per una quai festa, la
sciura Richeta e la sciura Angela. Sübet dopu e vegneva la butega del “Roscio”. Biancheria, naster e burdett, e, me
par de regurdass, el gh’eva la machineta de quatà i buton. De ch’el oltra part de la strada, propi sol canton e gh’eva
le mitiche “Figina”! Affettati, (pruerbial ul “taj fresc”), furmaj grata e de gratà, strachén, tonn. La pasta la se crumpava
a eti. Se diseva “sciolta Sigarett, tabacc, tuscani e tuscanei. Al banc la “sciura Palmira” (morta a puse de cent’ann), e
i so tusann Gina e Giulia
In sô un tuchel e gh’eva ul prestine: I Corti, che pian pian lè diventä: “Andreina”. Dopu ul purton de “Andreina” gh’eva
un barbê de omm.; sübet dopu vegneva ul “Cafè Milano”. Se sbagli mia, in di temp in dre, el se ciamava “Caffè Biffi”.
Alura e gh’eva dent ul “Nolberti” ; dopu lè na dent un Rota de Valmadrera. La sua dona la ciamaven “la Biunda” o
senò “la sciura Chiara”…………….
Ecu, me o fa un gir dela “Piazza”, insce cumè se regordi me. So turna indre cun la memoria a……. anta e rotti ann
fà: magari o scunfudü un quai nomm, una quai persuna, o lasâ in dre una quai butega…… ma, co mia lasâ in dre i
en i ricordi, i vus di so gent, ul risciul, i paracai e suratôt ul nomm di bagai che giugava e che in “Piazza” i even truâ
la manera de diventà grant: Tati, Elisa, Romana e Silvana e Renzo, Miglio, Afro, Gino, Eugenio, Giuliano, Natalino e
tanti, tanti, tanti olter amò che adess in vegett,………. quasi cumè mé!
Giorgio Magni