fotos ............................................... pag. 4 “Falsi”, Toras contis

si cjacarave. Di chês che a jerin, scartade subite
inzegnerie o soi colât su la facoltât di agrarie. Ducj
i carieriscj a si ingrumavin a medisine, leç o economie.
Agrarie e jere pai fîs di contadins, pai studiôs
o pai sfigâts. Jo o jeri di chei ultins. Mi plaseve la
idee di studiâ une robe che si podès cjalâ di dongje
e che il fâ i bêçs e fos une idee lontane. Mi sbaliavi.
Pai fîs di contadins al jere impuartant nome dulà
che lis robis a podevin butâ, par chei altris la teorie
e leve fruçade, sgarfade fin insom. Daspò doi
mês o volevi lâ a lenghis ma no si podeve.
O levi in biciclete tal ex convent là che a jerin lis
lezions e mi indurmidivi inte ultime rie cul bloc
e la pene in man. I fîs dai imprenditôrs agricui a
rivavin cul Toyota, cul spaiderin e cui vistîts pene
screâts. Jo peçotôs no olsavi nancje lâi dongje
par no incragnîju. O postavi la mê bici dongje dal
Toyota e o vevi fastidi di sgriâi la flancade. O sopuartavi
nome doi cors, chel de bire e chel des âfs.
Par chês altris oris, se al jere biel timp, mi distiravi
tal prât dentri parcè che di fûr al jere l’obitori e nol
sameave biel pendolâsi cun chei che a spietavin il
funerâl.
sîs
Se o vevi lezion tal daspomisdì o puartavi di cjase il
panin cul formadi tal scartòs dal pan. Cul remenâsi
te sporte, il cuarnet al pierdeve il cûl, la fete di formadi
e coreve pal sacut e cuant che lu cirivi o vevi
tocs di pan e formadi impanât tai fruçons ator pal
scartòs. Nol faseve plui la sô biele figure di panin.
Cussì mi vergognavi di chel bocon sgnangassât. O
levi a mangjâlu bessôl, te ultime rie de aule grande,
glotint svelt par no spiegâ nie a di nissun.
Un barbon, Robert, che al rivave in bici come me,
si inzegnave a vendi vâs di mîl di cjase. O ai savût
dopo che ju cjoleve di un apicultôr e si tignive une
contis
mandule di un trente par cent. O ai pensât di inzegnâmi
ancje jo. Ce podevio fâ. O ai metût ator la
vôs che la sporte che o menavi intor mi le jeri fate di
bessôl. Mi soi inventât il mistîr di cusî borsis di corean.
Fate une a son plasudis, e dutis lis compagnis
di cors a’ndi volevin vê une. Mi costavin cuindis mîl
di materiâl, lis vendevi a trente ma o vevi une setemane
di lavôr. Dut il me timp libar al jere doprât par
cusî, piturâ e lustrâ. O vevi tantis di chês ordinazions
che o vevi ce fâ a stâi daûr. O cjolevi une piel
par setemane li de Cjase dal corean, o jeri deventât
il lôr miôr client. Dopo trente sportis no’ndi podevi
plui. Di studiâ no si cjacarave nancje ma me pari mi
viodeve impegnât e par lui no pierdi timp tai libris
al jere za alc.
Une frute mi cjalave cui voglons pierdûts cuant che
o rivavi cuntune sporte gnove, fin che e à cjatât il
coragjo: - Mi le fasistu ancje a mi? O speravi che e
ves altri ce dî, daûr des vogladis a sclipignâ che mi
tirave. - Fin al prossim an no rivi a fâtile, no pues
plui di cusî sportis!
Tant par dî alc. O varès vût gole di fevelâi de mê colezion
di latinis di bire vueidis, tant par cognossisi.
O smicjavi alt: torzeonâ pe citât, cjalâsi tai voi, bussâsi
tal scûr di un cine, rivâ cuntun bus a la ultime
fermade, robis cussì. O vevi la passion di jentrâ tai
condominis e rivâ al ultin plan par viodi se si rivave
sul tet, che une volte mi àn cjatât e no savevi ce
rispuindi e o soi corût vie come un lari disint che o
cirivi l’assensôr. Jo cualchi idee le vevi, une ideute
di metile in vore cun jê.
- No impuarte - mi rispuint jê - no ai premure.
Jo mi le varès fruçade ancje a pitinton, di premure
su doi pîts. Ancje la borse je le varès fate subite,
parcè che mi plaseve jê. Ma no olsavi frontâle di pet.
- Ti le fasarai a pene che o pues.
Jê e jere plui spavide di me e dut al è finît prin di
tacâ.