fotos ............................................... pag. 4 “Falsi”, Toras contis

fevelâ dal vin che, ducj chei che a passavin pe strade
sotmont, si fermavin a cerçâlu. E chê e jere la sô
sodisfazion. No contavin plui ni i bêçs spindûts ni
lis faturis fatis. Cuant che a vevin mangjât lui e i
siei, i bastave di sintî a dî “Ce vin, Pieri, ce vin!”.
Si poià sul schenâl de cjadree de scrivanie e al dè
une voglade di fûr, sot la largje tieze de terace parsore
de puarte di ingrès dal cjasâl. Un ragn a riis
zalis e neris al vignive jù par un fîl che al partive
de tele fate fra un trâf e la colone di cjanton de
terace. Pieri lu cjalave incuriosît cirint di visâsi
di alc che chê inmagjine, o pe lûs o pal moment
de zornade, i dismoveve inte memorie e che, par
tant che si sfuarçàs, nol rivave a ricuardâ. Il ragn
al continuave a vignî jù biel planc scussiant, sul
sfont, in prospetive, i cjâfs verts e zaliçs des vîts,
là che la pendence de culine e deventave plui dolce,
fin a trasformâsi in plan. A jerin stâts siei fîs a
volê slungjâ la vigne fin là jù. Lui al veve lassâts i
divisoris e i injenfris tant che ju veve lassâts il vieri
Nardin e, prime di lui, so pari e ducj i Tibins, di
cuant che a vevin cjapade sù lôr la proprietât. Ma
i siei fîs, tratant di fâ cualchi bote di plui, a vevin
dislidrisâts ducj i arbui cressûts tai ôrs des fratis
e, daspò cualchi timp, a vevin parfin sapulide la
Manganize, in cjane armade sot tiere, in mût di
podê plantâ parsore altris vîts.
In chel lûc, propit in direzion di li che al vignive
jù il ragn, cuant che lui al jere frut, la Manganize,
ancjemò libare di cori a viert inte ombrene de
sô cort di arbui, e faseve un volt sec, a drete, e la
aghe, puartant vie fin là che e veve podût il tieriç
de spuinde, e veve discrotade scuasit dal dut la
lidrîs di un grant pôl cressût intal lenzit di chel
comedon. Vie pal istât, tes zornadis plui cjaldis, lui
e Vigji si fermavin li a fâ cualchi salt te aghe frescje,
daspò di vê mitudis jù lis vuiscjadis o vê corût
daûr ai fasans.
contis
Al jere stât propit di li, intun daspomisdì di istât,
che, rimpinantsi sù pes lidrîs dal pôl, par saltâ
fûr dal poçon che si formave intal volt, cui voi a
fîl de jerbe a vevin viodude a rivâ, dilà de linie dai
vencjârs che a lavin vie al pâr de aghe, la Balila dal
fi dal cont, cun dentri il signorin che le guidave
e, in bande, la Grispone che e rideve. Parcè che le
clamassin “Grispone” a vevin vût mût di imparâlu
plui tart, di coscrits, cuant che, passant sot dal
barcon de sô cjamare, le vevin viodude sintade
sul antîl bas, cu la cotule parsore dai zenoi e, lôr,
sbregots, i vevin berlât “Dai, Grispone, tire sù ancjemò
un fregul” e jê, cence scomponisi, ur veve
sbatude in muse la sô bielece e lôr a jerin restâts
tant che cocâi, cu la bocje vierte e il nâs in sù, e a
jerin scjampâts vie di corse, ridint, par no savê ni
ce dî ni ce fâ.
E jere biele, la Grispone, e e veve une vôs, cuant
che e cjantave, che la sintivin in dut il borc disot,
par no dî in dut il paîs. Ma e jere strambe. La int
e diseve che e jere cussì di piçule in sù. E jere fie
dal tapecîr e di frute le vevin metude a servî inte
vile che il cont al veve in paîs, par che e viodès dal
fi plui piçul: il signorin, lu clamave la servitût e la
int dal paîs. E zirave vôs che une volte il vieri cont,
il pari dal signorin, tornant in caroce di un paîs
disore Udin, là che chei siôrs a vevin un altri palaç,
vint cjatât, fûr dal ingrès de vile, l’urinalut dal fi
no ancjemò disvuedât, imbestialît a viodilu li, al
veve clamade la piçule governante e jal veve tirât
in muse cun dut ce che al veve dentri, berlanti che
cussì e imparave a no lassâ ator cierte robe. E jê, di
grande, si jere svindicade e e veve continuât a fâ
la “governante” dal fi ae sô maniere, lant a asedâ,
cussì a disevin lui e Vigji, cul signorin aromai cressût,
pes boschetis de Manganize, des bandis dal
pôl dai Tibins. Ma la storie no jere lade trop indenant.
Daspò pôc timp, une gnot, il signorin al jere