copione - Silveria Gonzato

CORO:
Ninfa, bela ninfa, làsselo star,
ormai i è vint'àni che ‘l continua a tribular.
8
CALIPSO:
Lu el pianséa, i dèi i me comanda,
sola són restà, tra sti fiori de lavanda.
L’ò mandà tra la gente, dìghelo al siór Pare…
Senti Mercurio, la cognóssito me mare
CORO:
Ninfa, bèla ninfa, l' è la giusta decisión,
t'è sèlto el momento e la bòna ocasión.
CALIPSO: (rivolta ad Ulisse ancora nascosto dietro le canne)
De ti voléa far el me caro spóso
e invésse no te sì stà gnanca moroso.
Són zóena, són bèla, són anca divina,
la pèle ghe l'ò lìssia anca de matìna.
Porto i cavéi lónghi, neri e rissi,
verso i mortali no g'ò pregiudìssi.
Tègno de mio anca qualche sostànsa,
ma de Itaca tua te sentivi la mancànsa.
ULISSE:
Scùseme, Calipso, g'avéa tanta malinconia,
mi sempre pensavo a la dòna mia;
sola l'ò lassàda con ‘n butìn picinìn
e fòrsi, adesso, la g'à 'n altro vissìn.
Me manca la me isola co’ le piére bianche,
che ai vèci sapienti le ghe fa da panche.
Me manca el me arco, me manca el me can,
verso de ti, són stà proprio ‘n vilàn.
CALIPSO:
Dir "vilàn" no l'è bastànsa,
la vita con ti, no l'è stà 'na vacànsa!
Mai ‘n complimento, manco 'n' ociàda,
la me feminilità te l'è proprio bistratàda.
ULISSE:
Insieme ai compagni anca la nave ò perso,
par quel dio imbestià, par quel dio roèrso!
El ghe l'à con mi, par l' òcio de so fiól:
s' el pericolo l'è grando, se fa quel che se pól.
'Na mùcia de compagni quel el m'à magnà
e mi, par fermarlo, co’ ‘n pal l'ò orbà.
NETTUNO:
Tompèste! Uragani! fulmini e venti!
Fasìghe saltar fóra parfìn tuti i denti!