Algemene Jaarvergadering - TopMed

TOPMED MEDIESE SKEMA
FINANSIËLE JAARSTATE
vir die jaar geëindig 31 Desember 2011
VERSLAG VAN DIE RAAD VAN TRUSTEES (vervolg)
11. OUDITKOMITEE
’n Ouditkomitee bestaan ooreenkomstig die bepalings van die Wet. Die ouditkomitee tree op in opdrag van
die Raad van Trustees, by wyse van skriftelike opdragte met betrekking tot sy lidmaatskap, gesag en pligte.
Die Raad van Trustees stel ’n ouditkomitee van minstens vyf geskikte en gepaste begunstigdes aan, van wie
minstens twee lede van die Raad van Trustees is. Die voorsitter van die Raad van Trustees mag nie in die ouditkomitee
dien nie. Die ouditkomitee kies uit sy lede ’n voorsitter. Nie een van die lede, insluitend die voorsitter,
is beamptes van die Skema of sy derdeparty-administrateur nie.
Die finansiële bestuurder van die administrateur, die interne ouditeure en die eksterne ouditeure het onbeperkte
toegang tot die voorsitter van die komitee.
Ooreenkomstig die bepalings van die Wet is die komitee se primêre verantwoordelikheid om die Raad van Trustees
by te staan in die uitvoering van sy pligte met betrekking tot die Skema se rekeningkundige beleid, interne
beheerstelsels en finansiële verslagdoeningspraktyke. Die eksterne ouditeure doen formeel aan die komitee
verslag oor die kritieke bevindings voortspruitend uit ouditbedrywighede.
Teen die jaareinde het die komitee uit die volgende persone bestaan: Hendrik van Riel, JP du Toit en Johan
Kemp onder die eksterne voorsitterskap van Herman Kriel (dit is ’n statutêre vereiste dat die voorsitter ’n onafhanklike
party moet wees). John Rollason (hoofbeampte) woon hierdie vergaderings by.
Die komitee het in die loop van die jaar drie keer vergader: 17 Maart 2011, 11 April 2011 en 26 Oktober 2011.
12. BELEGGINGSKOMITEE
’n Beleggingskomitee tree op ooreenkomstig ’n mandaat van die Raad van Trustees, by wyse van skriftelike
opdragte met betrekking tot sy lidmaatskap, gesag en pligte. Hierdie komitee bestaan uit vier trusteelede. Die
hoofbeampte woon ook hierdie vergaderings by. Die komitee se primêre verantwoordelikheid is om die Raad
van Trustees by te staan in die uitvoering van sy pligte met betrekking tot die Skema se beleggingsbeleid.
Die komitee het in die loop van die jaar ses keer vergader (afgesien van verskeie informele besprekings). Teen
die jaareinde het die komitee uit die volgende persone bestaan: Cobus Fourie (voorsitter), Hendrik van Riel, Jan
Burger en Phil Gallie.