Algemene Jaarvergadering - TopMed

c. ’n Lid vra of die Skema se litigasiekoste teen Sanlam terugbetaal is. Mnr Deacon meld dat die
Skema hul rekening vir ’n terugbetaling ingedien het, maar dat Sanlam beswaar aangeteken het
teen sekere items op die rekening, met die gevolg dat die regsverteenwoordigers in gesprek is
om die saak op te los. Hy noem dat ’n ooreengekome skikking oor die totale bedrag wat deur
TopMed geëis is, teen einde Junie 2011 aangegaan sou word. Mnr Du Plessis lig die aanwesiges
in dat van die regskoste vir vorige litigasiefases reeds deur TopMed gedek is, en dat daar
nou ±R2m uitstaande is. Die lid vra voorts hoe die trustees beoog om die toekenningsbedrag
te bestee. Die voorsitter meld dat die Beleggingskomitee die geld sal bestuur – wat tans in
die Skema se totale portefeulje is, in reserwes wat belê word om aan die Skema die beste
inkomste en kapitaalwins te gee – en sal verseker dat die likiditeits¬vereistes ook in plek is.
Mnr Fourie (voorsitter van die Beleggingskomitee) meld dat die komitee die Skema se fondse
met omsigtigheid bestuur en beklemtoon dat die Wet op Mediese Skemas verhoed dat die
trustees die fondse aan sekere lede uitkeer. Hy voeg by dat die trustees verplig is om die Skema
te bestuur op ’n wyse wat al die lede bevoordeel. Hy meld ook dat die Skema in ’n goeie posisie
verkeer om aan lede mededingende tariewe te bied, wat die trustees reeds gedoen het deur nie
hul premies te verhoog in ooreenstemming met voordele wat deur die reserwes gesubsidieer
word nie, in afwagting van die Sanlam-toekenning. Mnr Fourie wys op die feit dat TopMed een
van die min skemas is wat nog tandheelkunde¬voordele uit die risikoportefeulje – en nie die
spaarfonds nie – aan sy lede bied. Hy voeg by dat dit die laaste geleentheid vir die Skema sal
wees om sy ledetal uit te brei, deur die geld met oorleg te bestuur en voordele te bied wat sy
huidige lede sal behou en ook nuwes sal lok.
d. Mnr Du Plessis verduidelik dat die Skema ’n kleiner bedrag ontvang het as wat in die media
verwag is, omdat die regters slegs rente vanaf die datum van die dagvaarding toegestaan het,
wat ’n beduidende impak op die totale toekenningsbedrag het. Hy noem ook dat die Skema nie
appèl aangeteken het nie, as gevolg van ’n besluit deur die twee partye om nie teen die finale
toekenningsbedrag te appelleer nie. Mnr Burger voeg by dat die wet bepaal dat ’n enkelvoudige
rentekoers van 15.5% gebruik moet word om die koers te bereken, en nie saamgestelde rente
nie. Me Hau-Yoon vra wat die basisbedrag was wat aan Sanlam geleen is en mnr Du Plessis
noem dat dit ±R240m was. Die voorsitter vra of die lede tevrede is om die hoofstuk oor die
arbitrasiesaak teen Sanlam af te sluit en dat die saak nie weer geopper word nie. Die lede gaan
hiermee akkoord.
e. Mev Gordon versoek die trustees om lede toe te laat om hul aangewese apteke te gebruik,
omdat dit vir hulle voordelig is om van die dienste van plaaslike apteke gebruik te maak. Me
Duffy word versoek om vas te stel of mev Gordon se apteek op die netwerklys is, en indien nie,
dit daarby te probeer voeg. Mnr Fourie noem dat dit vir die Skema belangrik is om ADV’s te hê,
omdat hulle help om die Skema se koste te beheer. Hy meld dat die Skema se besluit om Clicks
Directmedicines te gebruik TopMed meer as ±R2m gespaar het. Hy meld dat die Skema nou sal
probeer om soveel apteke as moontlik by sy netwerk te voeg. Mev Gordon vra ook of daar ’n
bron is wat lede kan gebruik om vas te stel watter lede nie vergoed sal word nie, voordat hulle
vir die dienste betaal. Me Duffy sal dit ondersoek en aan mev Gordon terugvoer gee.
f. ’n Lid noem dat Discovery Mediese Skema verskeie voordele aan sy lede bied, soos afslag op
vliegkaartjies, ens. en dat die Skema mededingend moet wees in hierdie verband. Mnr Knox
meld dat TopMed-lede op sekere opsies kwalifiseer om by Multiply – ’n beloningsprogram wat
soortgelyk is aan Discovery se Vitality – aan te sluit en skets van die voordele wat Multiply bied.
Mnr Knox versoek die lede om hul makelaars te vra om hulle in te lig oor hoe hulle toegang tot
hierdie voordele kan kry. Hy voeg by dat hy as ’n makelaar kan bevestig dat dit baie moeilik is
om jong lede na ’n mediese skema te lok.