Untitled - Inspirasie - Weebly

Die wonder van ma word
Elke keer as sy na my kyk met haar groot bruin
ogies, besef ek net weer hoe afhanklik die klein
mensie van my is en hoe sy vertrou dat ek haar
sal beskerm van alle gevaar, net soos ons Die
Vader vertrou om ons te beskerm. As sy maar
net kan weet hoeveel sy vir my beteken en hoe
oneindig ek haar lief het. Sy wat vir my `n baie
groot wonderwerk is.
Hoeveel keer moes ek hoor, ek sal nie sommer
kan kinders baar nie, maar God Ek wil haar
oppas en koester teen alle gevaar solank as wat
ek lewe, al kos dit soms duur, soos gister toe
haar naelstringetjie af begin val het, vir my was dit iets vreesliks, want
volgens my kennis moet dit eers oor twee weke afval. Wel ek jaag toe met alle
geweld dokter toe en betaal `n plaas se geld net om te hoor; dis dood normaal.
Wel toe voel "super woman" sommer "super stupid" en "super broke!"
Dit wat ek eintlik wil tuisbring is dat my liefde en omgee vir die kindjie nie in
geldwaardes gemeet kan word nie, eintlik in geen wêreldse waardes sal dit
gemeet kan word nie. Wanneer ek dink aan haar toekoms voel ek soos n
vegter wat vir haar n pad wil oopveg deur die wêreld en haar beskerm teen
alle gevare. Ek voel trots en braaf as ek aan haar dink en weet diep in my hart
sal ek elke oomblik saam met haar koester. Ek weet ook natuurlik dat ek niks
sonder God kan vermag nie en dat ek op my knieë sal moet bly en haar elke
dag aan Hom moet opdra, want sonder Sy beskerming en Liefde kan ons nie.
Hoe duidelik word als nie, as ons self ouers word nie. Ek weet nou hoekom
Jesus gesê het ons moet weer soos kinders word om in Sy koninkryk te kan
ingaan. Ons moet weer glo en vertrou soos die klein mensie hier voor my.
Hoe wonderlik is dit nie om te weet God laat alles ten goede saam werk. Om
deur so klein mensie, wat nog nie eens kan praat nie, God se boodskap te kan
kry. Dis seker die grootste wonder van ma word om God weer van voor af te
leer ken en te ervaar deur die kleine mensie. Dis n pad van voorspoed en nie
teëspoed, want met God aan ons sy wie kan dan teen ons wees?
Lizl Prinsloo