Procesverbal, datë 26.11.2012

Piro Lutaj – Që të jemi të qartë edhe me zotin Tërshana, në qoftë se të gjitha pyetjeve që
ju bëjmë ne, do t’i vini definicionin që për këtë ligj është debatuar dy vjet, do të thotë se ne po
diskutojmë kot.
Zoti drejtor, ky është një term që cenon edhe fusha të tjera të veprimtarisë në Republikën
e Shqipërisë. Ka legjislacione të tjera që e përmendin këtë termin “mbrojtje”, siç i përmenda.
Çfarë të keqe ka në qoftë se kemi të bëjmë thjesht me termin? Ajo që më shqetëson është se pas
termit (hajt po e kalojmë termin), unë kam të drejtë të mendoj se do të kapërcejmë misionin.
Prandaj, le të jemi korrektë, kolegët i kemi të pranishëm dhe të jemi racionalë në propozimin.
Çfarë të keqe ka që ne ta definojmë mirë që kjo Agjenci është brenda misionit të Forcave të
Armatosura të Republikës së Shqipërisë dhe misionit kushtetues që ka Ministria e Mbrojtjes si
institucion, jo koncepti mbrojtje?
Leonard Demi – Këtu nuk ka ndonjë kontradiktë, sepse thotë: “Përcakton misionin”.
Urdhëroni!
Osman Metalla - Për të mos ndryshuar titullin, ne mund të shtojmë një përkufizim te
neni 3 për Agjencinë e Inteligjencës së Mbrojtjes, për ta saktësuar se çfarë nënkuptojmë më këtë
Agjenci. Natyrisht, edhe te fusha e zbatimit duhet të jemi më të qartë për t’i shkuar për shtat
Agjencisë së Inteligjencës së Mbrojtjes, në mënyrë që t’u adresohemi atyre shqetësimeve për të
cilat foli zoti Lutaj.
Faleminderit!
Leonard Demi – Urdhëroni!
Rezart Tërshana – Unë mendoj se shqetësimi i zotit Lutaj gjen përgjigje në nenet e
detyrave dhe të fushës së veprimtarisë të projektligjit, i cili absolutisht nuk mund të ngatërrohet
me agjencitë e tjera, që kanë termin “mbrojtje” në emërtesë. Për shembull, DIA e Amerikës,
ndryshe “defense”, është mbrojtje.
Leonard Demi – Zoti Tërshana, zoti Gjoni bëri një vërejtje në raport me nenin 1 të ligjit
të viteve 2003-2004. Çfarë do të thoni për këtë?
(Ndërhyrje pa mikrofon.)
Rezart Tërshana – Zoti kryetar, për mendimin tonë, neni 1 është i mirëpërcaktuar.
Për sa i përket veprimtarisë, që u shpreh si shqetësim, ajo gjen përgjigje në nenin 2 të
këtij projektligji.
Leonard Demi – Ju thoni se është i mirëpërcaktuar, sepse gjen shpjegim te neni 2.
11