Baafata

"Mana barumsaafi meeshaalee adda-addaaf horii nabarbaachisu argachuudhaaf mana
barumsaatti shaayee danfisee gurguruu, gabaattimmoo shonkooraa, muuziifi burtukaana
gurguruu nandanda'a. Baasii nabarbaachisuuf atiifi abbaankoo yaadda'uu hinqabdan. Hojii
mana keessaa naaf keennitanimmoo nanhojjedha. Yoon hojiikoo hinraawwanne ta'ee
mana barumsaatii nahambisuu nidandeessu." jette Saaraan haadha ishiitiin.
Saaraan dubbichi qalbiidhaan akka inni hidda yaafatu godhuudhaan karaa haadhaa ishii
abbaa ishii amansiisuuf yaalii gochuu itti fufte. Guyyaa lamaan itti aananiif walitti fuftee
yaada ishii haadha ishiitiif ibsuu qabde.
Saaraan Yeroo Warra Ishii Wajjin Mari'attu
Dhuma irrattis gaafa guyyaa sadaffaa harmeen Saaraa yaada mucaa isaanii
fudhachuudhaaf murteessan. Isaanis keessa isaaniitti waa'ee yaada mucaa isaanii
ajaa'ibsiifatan. Haata'uyyuu malee abban manaa isaanii tarii yaada kana fudhachuu dhiisuu
danda'innuu kan jedhu sodaan mataa isaanii keessaa hinbadne. Murtee mataa isaanii
garuu of keessatti qabatanii jiru. Saaraanis yaada ishii akka ishiin abbaa ishiitiif ibsitu itti
himan. Yaada abbaa ishii amansiisuu danda'an tokko-tokkos dabalanii itti himan.
Abbaan ishii gara galgalaa qonnaadhaa yeroo deebi'an Saaraan dhimma ishii itti himu
jalqabde. Haati ishii kan itti himte qabxilee nama amansiisuu danda'an utuu hinirraanfatin
abbaa ishii amansiisuudhaaf dubbii ishii itti fufte. Barumsa dubartiitti hamma kanatti kan
hin'amanne abbaan Saaraa akkaataa mucayyoon isaanii yaadashii itti dhiyeessite, ibsiteefi
ija-jabbeenyi ishii baay'ee isaan ajaa'ibsiise. Onneensaaniis tuqamee yaadashii fudhatan.
Torban itti aanus Saaraan mana barumsaa dhaqxee galmoofte. Saaraan hojii ishiif
kennamu hundaa hojjechaa baasii mana barumsaa ishii danda'aa barumsa ishii itti fufte.
34