Baafata

Sadarkaa 7
Oduu kannatti aanu dubbisi.
Masfiniifi Tizzitaa
Masfin kan ijasaa Tizzitaa irra buufatee dur yeroo umuriin ishii waggaa 10
tureedha. Masfiniifi hiriyootni isaa takka-takka yeroo Tizzitaan bishaan
waraabuu dhaqxu ishii argu turan. Bareedduudha jedhanii waan
yaadaniifis yeroo guddattu dubartii barreeddu akka taatu niamanu turan.
Masfin Naannoo sanaa dukkaanaa (suuqii)fi bakka qonnaa gaarii waan
qabuuf nama beekamaadha. Kanaafi kan yeroo Masfin akka Tizzitaa itti
eerumsiisaniif warra ishii gaafatu mamii tokko malee tole jedhaniin. Yeroo
sana umuriin Tizzitaa waggaa 12 duwwaa yoo ta'ellee warri ishii carraan
kana caaluu hindhufuuf jechuudhaan gaaffii sana fudhatan.
Ji'oota yartuu booddee Masfiniifi Tizzitaan walfuudhan. Guyyaa cidha
isaaniis namoota gurgguddaafi beekamoo baay'eetu argame. Cidhichaafis
sangoota baay'eetu qalame. Dhugaatiin adda-addaas qopha'ee ture.
Cidhichis kanaan dura naannoo sanatti qophaa'anii kan beekaman
cidhoota gurguddaa keessaa isa tokko ture. Masfinis baay'ee guddaa kan
ta'e sirna cidha kanaatti gamachuu guddaatu itti dhaga'ame.
Eega walfuudhanii booda mucaa utuu hingodhatin turuu Masfin
hinbarbaadne ture. Hiriyootni isaa garuu Tizzitaan ammayyuu ijoollee waan
taateef jarjaranii mucaa akka hingodhanne isa gorsan. Masfin garuu gorsa
isaanii dhaggeeffachuu hindandeenye. Ijoollummaa Tizzitaa yoo
hubateyyuu hojjaan ishii dheeraa waan ta'eef mucaa deessee guddisuu
nidandeessi yaada jedhuun mucaa godhachuudhaaf murteesse.
Cidhi isaanii darbee ji'oota yartuu keessaatti Tizzitaan ulfoofte. Garaan
ishiis yeroodhaa gara yerootti guddataa dhufe. Kana kan arge Masfin
baay'ee gammade. Gorsa hiriyootni isaa duraandursanii gorsanii turan
sanas hinaaffaadhaa wajjiin walitti qabsiisee yaaduu jalqabe. Akka yaada
Masfinitti shamarree Tizzitaa ulfeessuu danda'uun waan baay'ee isa
boonsuu ture.
Tizzitaan mucummaa ishii kanatti haalli ulfa ishii nagaadhaan itti fufuun
isaa nama baay'ee ajaa'ibsiisee ture. Yeroon ishiin itti deessu ga'ee
ciniinsuun gaafa qabu garuu guyyaa sadi'iif waraansaafi dhiphina guddaa
keessa turtee gara mana wal'aansaatti geessan. Akka ishiin achi geesseen
doktooronni haala ishii qoratanii eega mari'atanii booda baqaqsanii
deessisan. Haata'uyyuu malee mucaan dhalate du'aa ture. Masfinis warri
manaa isaa Tizzitaan mucaa du'aa da'uu ishii tokkichumaan dhaga'e.
63