Baafata

Haala Fokkisaa Qoqqobbii Irraa Dhufe
Faantaayeen akka hundumtuu fuula ishii dhowwate hubachaa dhufte.
Faantaayeen utuu warri ishii hindu'in dura barumsa ishiitiin tokkoffaa baati turte.
Hawwiin ishiis xiyyaara balaliisuu ture. Amma garuu kana yaaduu dhiisiitii
obboleessi ishiifi ishiin guyyaa guyyaadhaan garaa isaani guuttatanii
buluuniyyuu waan guddaa ta'ee jira.
Guyyaa tokko Faantaayeen barumsa ishii dhiisuudhaaf lafa ishiin qophooftee
jirtutti barsiistuun herregaa ishii Addee Tasammeen Faantaayeen maaliif yaadi
gaddaafi dhiphinaa akka itti galee gaafatte. Dur barumsa ishiitiin jabduu kan
turte Faantaayeen amma qabxiin ishiis gadi bu'aa akka jiru Addee Tasammeen
ibsiteef.
Addee Tasammeen waa'ee Faantaayee ilaalcha gaarii kan qabduufi kan ishii
jaal'attu barsiistuu ishiiti. Addee Tasammeen uumamuma ishiitiin barsiistuu
nama kabajjuufi kokkolfituudha. Barattoota ishiitti garuu fuula hinkennitu.
Faantaayeen du'a abbaafi haadha ishii barsiistu ishiitti himuu hinbarbaanne.
Haata'uyyuu malee torban sun ishiifi obboleessa ishiif baay'ee rakkisaa waan
tureef Faantaayeen haala jiru barsiistu ishiitti himuudhaaf dirqamte.
"Warrikoo eega du'anii jalqabee namootni natti hindubbatan. Firoonnikoollee
nahingaafanne. Nyaata dur nuergaa turanillee amma nuuf hinergan. Horii
argachuuf jedhee namoota ganda sana jiraataniif bishaanin waraaba. Garuu
bishaan waraabuun horii ga'aa hinargamsiisu. Kanaaf barumsakoo
dhiisuudhaafin jedha." jettee Faantaayeen barsiistuu ishii Addee Tasammeetti
dubbatte.
Yeroo Faantaayeen waa'ee du'a warra ishii dubbattu barataan tokko dhaga'ee
ture. Innis oduu dhaga'e hiriyoota isaa birootti hime. Akka kanatti barattootni
mana barumsaa sanaa waa'ee du'a warra Faantaayee dhaga'an.
91