Baafata

Akka achi ga'eenis fooliin tamboo (sijaaraa) baay'ee ciinca'u itti dhaga'ame. Akka
dhukkubuus ta'e. Barattootni sunis caatii qonnaa qotee-bultoota naannoo sanaa irraa
cabsanii fidan utuu isaan taa'anii qama'aniifi tamboo xuuxanii ilaale. Saaliim kana yeroo
argu caalaatti dukkubniifi naasuun itti dhaga'ame.
"Nu fakkaadhukaa obboo!" jedhe dargaggoota sana keessaa inni tokko Saaliimiin.
Shamarran keessaa tokkos "As siqiitii nu wajjin qama'i!" jette Saaliimiin. "Waan nama
miidhu miti. Gaafa afaaniin tuqxu nijaala'ata!" jettee shamarree biroon Saaliimin
hawachuuf.
Saaliim gidduutti rakkate. Kanaan dura warri isaa caatii qama'uufi tamboo xuuxuu akka
hinqabne itti himanii turan. Barsiisaan saayinsii tamboo xuuxuun fayyaa irratti balaa
hammamii akka inni fidu kanaan dura kan inni itti hime yaadate. Saaliim kanaan dura
barataa ta'ees gaafa nama guddaa ta'u caatii akka hinqamaaneefi tamboo akka hinxuuxne
murteessee jira. Haata'u malee naannoo isaatii akka inni caatii qama'uufi tamboo xuuxu
kan isa hawwatan dargaggoo baay'eetu jira. Saaliim garuu barataa murtee isaatti cimeefi
barsiifata hamaa irraa of dhorkuuf kutateedha.
Sadarkaa 7
Tapha
Barattootni taphattoota oduu "Saaliimiifi Kara-deemsa Isaa" jedhu keessati
caqasaman akka dubbatan gaafadhuutii deebii isaanii gabatee gurraacha
irratti barreessi. Fedha kan qaban gareewwan lama taphattoota bakka
bu'uudhaan tapha akka dhiyeessan godhi. Isaanis filannoo armaan gadiitti
gargaaramanii akka dhiyeessan itti himi. Garee inni duraa filannoo isa
jalqabaa garee inni lammaffaammoo filannoo isa lammataatti akka
gargaaraman itti himi.
Filannoo Tokkoffaa:
Saaliim gaaffii dargaggoota sanaa fudhatee isaanitti makama.
Tamboos nixuuxa. (Saaliim yeroo mana ga'u maaltu isatti akka
dhaga'amu gareen tapha dhiyeessu sun akka agarsiisu itti himi.
Filannoo Lammaffaa:
Saaliim ofitti amanee dhiibbaa dargaggoota sanaa danda'uudhaan
gaaffii isaaf dhiyaate hinfudhadhu jedhee isaan gatee deema. Mana
yeroo ga'us waan godhetti gammada.
73