Der Bierstaedter November 2014

Seite 6
Schdons Gedanken
So Freunde, der Summer is rumm und es werd langsam Zeid, dass ich mich widder amoll bei
eich meldn du. Obber heit wer ich eich amoll nix ieber Musik erzähln. Na, heit erzähl ich amoll
wu ich mich su rumgedriem hob. Freunde, ich wor heier amoll in Deutschland unterwegs und
zwor on der Elbe, in Dessau-Rosslau und in
Widdnberch (Wittenberg). Ihr wisst scho,
des is die Stodt in der der Luthers Martin sei -
na 95 Thesn on die Dier ver derer Schloss -
kerng ongschlong hot. Natürlich sinn mir,
meine mich liebende Fraa und a befreundetes
Ehepoor net wechern Luther in die Gegnd
gfohrn, na, mir homm unner Kulturbedürfniss
in die entsprechenden Brauhäuser befriedicht.
Umgschaut homm mir uns selbstverständlich
in diea Städt aa. Net dassmer
denkn konn, mir wärn blus weecher derer
Sauferei fortgfohrn.
Also wie scho gsocht, mir sinn do noch
Dessau gfohrn und homm in am Vorort, di -
rekt on der Elbe übernocht. Mir homm zwor
direkt om Fluss gewohnt, obber a Schiff homm mir dort net gsäng. Nochts sinn amoll a poor
su Luxuskreizfohrdompfer verbeigschibbert, obber gsäng host sa net, blusner brumma ghert
host sa.
Obber, ich denk amoll, dasses besser is, ich erzäll der Reiha nooch.
Beim Hiefohrn noch Dessau musst mer amoll a Pause eilegn. Des hommer om
Goitzschesee gemacht. Des is vielleicht a riesn Lachn Wasser! Entstandn is der See wie sa den
Braunkohleobbau aufgheert und die ganza Gegnd dort gflutet homm. Alle Achtung wos dort
entstandn is. Do gibt’s jetzert Hotels, Sondstrond, Seglclubs, Ausflugsschiffe und, und, und.
Für die Großstädter aus Leipzig hot mer do a super Naherholungsgebiet gschaffen, des is einfoch
schee. Mir homm uns die Gaudi ongschaut und sinn, walls a bisserla kolt wor, a amoll in
su an Strondkiosk und in a Wertschaft die gheitzt wor. Des Bier hot gschmeckt, des Essn aa
und vor allem, die Leit worn allazamm sehr freundlich. Noja, vielleicht homm die gemerkt,
dass mir aus Kulmboch kumma.
Auf unnerm Wech zu unnern Hotel semmer dann a nuch in a alts Wasserwerk und homm
uns des ongschaut. Do homm die Bitterfelder in am altn Wasserbehälter a Museum neigstellt
des hot miech als altn Wasserwerkler schwer beeindruckt. Do wird amm in aaner klasse Oort
und Weise die Gschicht rund ums Wasser su dorgstellt, dasses zergor a Laie begreift, wie wichtich
a gscheita Wasserversorgung is und wos des für a Aufwond is, dasses immer in Ordnung
is. Des alta Wasserwerk in Bitterfeld kommer nur empfehln. Wenner in die Gegnd kummt,
schaut amoll dort verbei. Und, wie scho gsocht, wer net in su a Ausstellung will, für den gibt’s
genuch annera Sachn rundrum wie den Peglturm mit seiner Aussichtsplattform und natürlich
a a poor Wertsheiser, Schiffsrundfohrtn und Möglichkeitn sich einfoch amoll hiezersetzn und
die schee Gegnd onzerschaua.
Vom altn Wasserwerk aus wollten mir dann schnellstmöglich zum Hotel fohrn. Obber do
is nix draus worn. Denn mir sinn on Ferropolis verbeigfohrn. Die Einheimschn nenna Ferropolis
die Stodt aus Eisn. Do hot mer in am Freilichtmuseum die altn, riesichn Braunkohle-Förder -
maschina ausgstellt. Beeindrucknd !
Ombds semmer dann doch nuch gut im Hotel onkumma und homm den Dooch mit am
gutn Essn ausklinga lossn.
Om nechstn Dooch, su hommer des gedocht, machmer a erscht amoll a wengla auf Kultur
und dann gemmer ins Bräuhaus noch Dessau. Aufm Programm stond deshalb der Park ver
Wörlitz. Obber wie`s bei uns su üblich is. Mir fohrn net auf am gewöhnlichn Weech on a Ziel,
na mir senn bei Coswig mit der Fähre über die Elbe niebergfohrn. Des wor a ganz besondra
Fähre. Die hot nämlich kann eichna Ontrieb, Die wird durch die Strömung über die Elbe
gezugn. Möglich macht des a ganz besondera Kettnkonstruktion. Ganz rarffiniert!. Dann semmer
ver der Fähre aus ieber su a holbericha Pflasterstroß noch Wörlitz kumma, homm unner
Auto obgstellt und sinn nein Park gewandert. Freund, do wor mer scho zwaa Stundn unterwegs
geweesn und iech hob einen riesn Dorscht ghobt. Obber es musst halt a amoll ohne wos
zer drinkn geh.
Also, aans muss ich sogn. Der Wörlitzer Park is werklichwohr an Besuch wert. Wunderbor
gepflechta Onlong, saubera Weech überoll und a die Figurn und des annera Zeich, wos do su
rummsdidd, einfoch klasse. Nochdem der Park aus einichen Insln besdidd, musstn mir über a
Haufm Brüggn nieber. Monn, woss senn mir geloffn. Noch einicher Zeit semmer dann zum
Wörlitzer Schloss kumma. Des is renoviert und aa an Besuch wert. Mir homm obber net in
des Schloss gewollt. Na, mir wollten zer der St.-Petri-Kerng, mit ihrm Biblturm. Ver dem Turm
aus hot mer, su hot des a Broschbeggd beschriem, an Ausblick ieber die ganza Geengd. Monn,
do bin iech obber neigfalln. Wall ich unbedingt auf den Turm naufwollt, hob ich mir a
Eintrittskartn kaaft und hob gfrocht wie viel Treppn iech do naufsteign musst. Noja, socht do
die Schnepfn on der Kass, des sinn 197 Stufn. Sportlich wie ich bin, bin iech dann do auf den
Turm gekrabblt. Monn wo riech fertich, wie iech do drum wor. Die Fraa hot mich nämlich ogewaaft,
des worn 198 Stufn. Hät ich des gewusst, wär iech untn gebliem. Obber wos solls. Die
Aussicht wor werklich klasse. Mer konnt zergor bis noch Widdnberch schaua. Dass die dort
obber su a weita Aussicht homm, liecht meiner Meinung noch dodronn, dass die Geegnd absolud
floch is. Wie iech meina Begleider und meiner mich liebenden Fraa, der bestn von allen,
des Drama mit meiner Durmbeschdeichung erzällt hobb, homm sa bluus gemaahnt, dass iech
ja gor net hädd neafsteign missn. Dann semmer weiter durch den Park gewandert. Mir senn
mit aaner Amtsfähre auf a annera Insl gfohrn. Für 50 Cent, bei uns kostert des mindestens
Zwaa Euro. Dann semmer om Gotischn Haus verbeigeloffn, homm a riesn Urne gsäng, die einfoch
su rumgstandn is, sinn on am grußn Weiher verbei, dann wor mer widder bei unnerm
Auto gstandn. Obwull iech nuch immer nix zer drinkn gricht hobb, muss iech sogn: Der Besuch
im Park ver Wörlitz hot sich gelohnt. Wenn ihr amoll in die Geengd kummt, schaut eich die
Sach unbedingt aa amoll on.
Nächstes Ziel wor dann Schloss Oranienbaum. Des wor bluus a poor Kilometer weg ver
Wörlitz. Noja, denen ihr Schlosspark wor a klasse, sehr gepfleecht und gruuß. Obber des
Schloss, des braucht scho nuch a bisserla handwerklicha Ärbert, bis su weit is, wie des Schloss
in Wörlitz. Des wird scho nuch a wengla dauern. Ongfangt homm sa obber scho. A Besich ti -
gung ver dem Park lohnt sich obber bestimmt. Wie mir dann in dem Park fertich worn, hob
iech gedocht, jetzert grichst wos zer drinkn und zer essn. Do wor ich ganz schee ausgschmiert.
Mir senn ohne Pause ins Auto gstieng und noch Dessau gfohrn.
In Dessau, ihr wisst scho, des is die Stodt in der des Bauhaus erfunna worn is, hommer
uns in am Parkhaus an Parkplotz gsucht und sinn in die Stodt nei, um die Bauhausstodt zu
er kundn. Do hodd dann obber a mei Kumpl gstreiggd. Der hodd dann aa gsocht, wemmer jetzert
net woss zer Essn grieng, dann fohr iech widder zum Hotel. (Hobbters gemerkt: kanner
ver uns zwaa hot mer woss vom drinkn gsocht). Noja, socht dann dem Kumpl sei Fraa, meina
hodd ihr zugstimmt. Nochdem die GSchicht mitm Bauhaus scho su lang her is und der Alta
Dessauer a scho su lang nimmer lebt, konn die Sach ja aa nuch a bisserla wartn. Also hommer
des Dessauer Brauhaus gsucht und aa gleich gfunna. Des liecht gleich ums Eck beim
Rothaus. Des Brauhaus haaßt offiziell „ Dessauer Brauhaus zum Altn Dessauer“.
Wenn ihr wissen wollt wer der alt Dessauer wor, konn ich eich a bisserla helfn. Fürst
Leopold I. von Anhalt Dessau wor bei die Preißn derjenicha, der denen ihr Heer nei organisiert
hot. Der hodd a dort den Gleichschritt eigfiehrt und nuch einicha annera Sachn. Nembei worrer
a nuch aaner ver denen ihra grußn und bekanntestn Heerführer und hot für die Preißn einicha
grußa Schlochtn gewunna. Aa in seim Fürstntum hotter einicha grußa Veränderungen in
der Verwaltung und im öffentlich Lehm eigfiehrt. Zergor an bekanntn Marsch hot mer noch
ihm benennt. Ich glaab, den spielt zergor unner Stodtkabelln.
Also, wie scho gsocht, mir sinn ins Brauhaus. Klasse, sehr guts Bier, guts Essn und werklich
wohr, aa sehr ongenehma Preise für su a Stodt. Mir homm uns do ordentlich gstärkt, dann
konnt mer amoll durch die Stodt laafn. A Haufml Häuser sinn do im sogenanndn Bauhausstil
gebaut. Des is der Baustil wu iech immer soch, dass diea Architekt in ihrer Kindheit mit
Schuhschochtln gspielt homm und diea Formen homm sa dann für ihra Bauwerke übernumma.
Blusner dassa do Fenster eibaua konntn und a öfters amoll grußa Glosfrontn als Auflo -
ckerung genumma homm. Viel ver die Häuser hommer obber in derer korzn Zeit wu mir dort
worn net gsäng. Do musst dann scho amoll a poor Toch länger bleim. Für diejenichn, die sich
für die Sach interessiern, brauchst halt einfoch a wengla mehrer Zeit wie mir. Iech schau mir
die Bauhaussach bestimmt amoll genauer on. Dann hommer des Denkmol vom altn Dessauer
sucht. Des hot a bisserla gedauert. Zwaamoll semmer do verbeigeloffn. Wall mir homm ge -
docht, des is a riesn Ding, hommer des net gleich gfunna. Dann hot sich rausgstellt, dasses
blusner su a klaana Figur is, a bisserla gresser wie der Büttner om Vereinshaus in Kulmboch.
Trotzdem, unner Besuch in Dessau hot sich gelohnt und is empfehlenswert für alla die sich für
Gschichte und des Bauhaus interessiern. Nur, a poor Dooch musst do dann scho opfern. Des
is obber ka Problem, guta Wertshäuser gibts a genuch.
Dann semmer widder ins Hotel gfohrn und homm den Dooch ausklinga lossn mit einem
super Blick über die Elbe. Iech konn immer widder blusner aans sogn: Es gibt nix schenners
wie wos schess.
Om nechstn Dooch hommer uns gsocht, do machmer a bisserla wenicher wie om Vortoch.
Vor allem dommer net su viel laafn. Unner Hauptziel on dem Doch wor Wittnberg, die
Lutherstodt. Natürlich semmer net blus wecher dem Reformator dorthie gfohrn. Na, dort gibt’s
aa, so hommer erfohrn, a Brauhaus, des sei Bier selber macht. Mir sinn als in Wittnberch
onkumma, homm unner Auto obgstellt und sinn in die STodt geloffn. Des mit ihra Parkplät is
klasse ongelcht. Mir homm blusner a poor Minutn gebraucht, dann wommer scho aufm
Marktplot gstandn. Ver dort aus wollten mir dann die Stodtpfarrkergn, des Lutherhaus die alta
Unversität und die Schlosskergn onschau. Wor alles ka Problem. Des liecht alles gor net amoll
su weit auserernanner. Blusner, außer ins Lutherhaus bist nirgendwu neikumma. Denn die
Wittnbercher homm alles eigerüst um des ganza alta Zeich für des Lutherjohr 2015 herzerrichtn.
Denn dann hot der Luther fünfhunnertjärichs Jubiläum zum Onschloch seiner 95 Thesn
on die Haustier ver derer Schlosskergn. Mir homm des, wos mer onschau konnt ongschaut,
homm, su wie sich des ghert (des hommer ver die Japaner gelernt) überroll Bilder gemacht
und dann semmer ins Bräuhaus Wittenberg. Des wor genau wie in Dessau, Bier gut, Essn gut,
Preise gut und lauter freindlicha Leit.
Dann semmer nuch über Zerbst gfohrn. Zerbst is die Heimotstodt ver Katharina der Großn.
Die wor amoll in Russland Zarin. Über Zerbst gibt’s net viel zu erzühln. Dort homm die Kergn
taalweis kann Dächer mehr, ver denen ihrm Schloss stitt nur nuch der Ostfliegl und der is a
Ruina und gscheita Wertsheiser hommer a kanna gfundn. Aufm Marktplotz stitt nuch su a
Rolandfigur wie in Bremen rumm. Die Fußgängerzona und der Park um des Schloss rum ma -
chen obber an sehr gepflechtn Eindruck. Dort tut sich woss. Irgendwann kumm iech scho nuch -
amoll dort hie. Dann wer iech mir des scho genauer onschaua.
Ombds wommer dann widder im Hotel, direkt on der Elbe ghockt homm den Toch mit am
Seidla Bier und am gutn Essn ausklinga lossn. Om nechstn Toch semmer dann gemütlich
hammgfohrn.
Rückblicknd muss ich sogn. Es wor a scheena Fohrt. Es wor sehr interessant in aaner
solchn schenn Geengd rumzerfohrn und wos über die Gschicht dort zu erfohrn, sich des ganza
Zeich amoll onzerschaua und a um dort die schee Gegnd zu erforschn. Es verlohnt sich in
jedem Foll amoll dort hie zer fohrn. Schauts eich on, dann kennter mietredn.
Bis zum nächstn moll,
Eier Schdon
Anzeigen
Impressum: „Der Bierstädter“ Erscheinung monatlich. Herausgeber: Roland Hermsdörfer.
Chefredakteur: Wolf Gittel (V. i. S. d. P.). Namentlich gekennzeichnete Artikel geben nicht die
Meinung der Redaktion wieder. Abdruck, Kopie, Vervielfältigung, auch auszugs weise, nur mit
Genehmigung der Redaktion möglich. Für eingesandte Beiträge kann keine Abdruckgarantie gegeben
werden. Eine Rücksendung ist nicht möglich.
Kauernburger Platz 4 · 95326 Kulmbach · bierstaedter1@web.de · www.bierstaedter.de
Telefon: 0 92 21 / 6 74 95 oder 87 82 41, Fax: 0 92 21 / 87 82 48
Anzeigen: G. Seidel. Für die Inhalte der Inserate sind die Auftraggeber verantwortlich.
In unserem Haus gesetzte Inserate dürfen nur mit unserer Genehmigung weiterverwendet werden.
Druck: MegaDruck.de
In Memoriam: Vera Hermsdörfer (V.H.)