slowenien - Kanuclub Obwalden

KCO WANDERUNG
07. 08. 2007
KCO BIKETOUR
09.09.2007 Daniela Della Torre
Äs isch 8i gsi wo äs paar KCO-ler und Ahängsäl (wiä ich zbsp) sich uf äm Dorfplatz in Sarnä
troffä hend. S’Wätter isch nani top gsi, derfür wenigschtäns d Motivation. Achtung fertig los
und mir sind eusi O-Tour mit äm Bike richtig Ramersberg gschtartät. Ja genau, s’isch am Afang
scho zimmli obsi gangä. Äs isch abär erscht dr Afang gsi. Eusä Tuiräläiter dr Mario hed ä up
and down Strecki planät, dämit mir möglichscht vill Chappeli z’Obwaldä gsehnd.
Also hemär bim erschtä dävo gschwind ä Verschnuifspausä gmacht und sind de äis
wiiter. Alles obä durä simer gfräset und de uf Schoried/Alpnach abbä. Uf därä Strecki simer
au scho dä erschtä O-Tour Streckäpöschtä und Fähnli begägnät. «Näi, näi, miär bschissid nid
und hend iis au nid verfahrä... mir fahräd eusäs äigätä Rennä», hemmer dänä brichtät. Quer
dur Alpnach, übär dä Flughafä und änä scho widär obsi simer gradlät. Das Mal isch äs richtig
«Chärnserwald» gangä. Z’Mitzt i däm Wald simer anäs Seeli cho... Eusä erscht Rascht hemmer
de au grad detä gmacht und hend d’Natur und d’Ruäh adäm Sunntigmorgä gnossä.
De isch’s überquerä vom Seeli/Moor agsäit gsi. Hmmm... wiä hend diä das agschtellt
isch jetzt sicher eui Frag. Isch nid sonä häxerei gsi... äs hed nämmli än Holzstäg gha Nid
ungfährlich. Äs hed sich um äis Haar öpper än Schuäh volä Wasser usäzogä. Isch abär grad
na guät gangä und mir hend chönä wiiter.
So hemär nach dä Waldpassage d’Hauptstrass Chärns-Stans querät und sind wiitär i
richtig Ächerli/Arvi uä. Au da hemär widär O-Tour Wägwiser gsichtät, sind de täilwiis au uf dr
offiziellä Strecki biket und hend na äs paarnä hopp gruäfä. De simär widär a äs paar Chappäli
verbi gfahärä. Hmm... diä Nämä hani mär nid chönä märkä... uf jedä Fall simmer denn zu
äim abbä gfahrä. Das isch grad under äm Flüäli gsi... ich glaub sogar s Wahlfahrtschappäli
isch das gsi. Nach äm strängä Wäg is Flüäli uä... mir hend d Velo fründlicherwiis gstossä...
detä hend mir de eusäs 2. Pick nick gmacht. Und aschlüssänd simer imnä Reschti gsi eus go
ufwärmä mit ämä Kaffee oder ebä änärä Ovi. Äs hed eus scho bitz gfrohrä womer widär usä
sind. Ja. Au susch mit däm uf und abä hed mär sich immer widär müsä umziäh. Warm wiä im
Hochsummer isch äs ebä im Herbscht scho nümä.
Öppis anders übrig blibä isch eus nid, so simmer wiiter pedalät. Richtig Edisried/
Sachslä isch äs nidsi gangä über Stock und Stäi, wiäs sich bim bikä ghört. Sogar mit ämä
Verwandtäbsuäch hani diä Biketour chönä verbindä. Hetti also am Morgä nuni dänkt. Z’
Edisried hani de vor mim Grosi ihräm Huus chönä ahaltä und gschwind «Sali» sägä. Und im
Spis de au na grad ämnä andärä Täil vo dä Famili. D’ Kumpels vom KCO sind idr Zwüschäziit
wiiter gradlät. Das hed für dä Adrian und mich de ghäissä... 1, 2, 3 und au vollgas richtig Älggi
dä andärä nah. Phu. S’ isch scho na streng gsi. Dä Atem heds äim rächt graubt. Zum Glück
hemmer nur än Täil richtig Älggi müsä.
Widär amnä schönä Plätzli mit ärä tollä Ussicht uf dä Sarnersee hemmär ufänand gwartät
und än Täil vom z’Viäri gässä. Aschlüssänd ischs de ischs abä richtig Giswil Campingplatz-
Reschti gangä. Detä hemmär namal öppis trunkä und sind de am See na zrugg uf Sarnä wo
mir na vodä Henriette und äm Mario uf än Snack igladä wordä sind. Nach äs paar Stund im
Sattel und ärä super Stimmig uf äm Bike hend mir dä häimä all z’ fridä und stolz chönä abstigä
und dä Sunntigabig gnüssä. Ja. Das wärs gsi. Bis zum nächschtä Mal. Ich dänkä ich bi widär
däbi
26 27