96 - Sciroeu de Milan

Nel pezzo Quel dì de dicember, nel
“Sciroeu de la pròsa” del numero
precedente, c’è stata una svista
importante (In è verbo e si scrive Hinn),
Vanetti e Calenzani si scusano, una per
aver fatto “la svista” e l’altro per non
averla corretta.
EL FINAL SBAGLIAA DE LA ROMANZA “MAT-
TINATA”
Fulvio Vichi
De fioeu mì gh’avevi ona bella vos, inscì come la mia
mama, el mè papà e la mia sorella. Vos de sopran i
dònn, vos de bariton mè pader e vos tenoril mì, vos
che hoo lassaa là in di Martinitt per via de la dòccia.
Minga semper gh’era l’acqua calda e vist che la dòccia
l’era on òbbligh, acqua calda ò freggia, te toccava de falla.
Per soramaròss ginnastica mattutina appenna levaasù,
in camisa de nòtt e finestron de la camerada spalancaa.
L’è stada la manera giusta per ciappà la bronchite crònica
e la raucedin che ancamò incoeu me fann compagnia.
Alter che diaframma!
Prima de la mòrt de mè pader s’eri staa compagnaa a
provà la vos dal Maester Lorenzo Perosi direttor del “
coro di voci bianche del Duomo”. Timid come s’eri la
vos l’è restada denter ma el Maester che ’saveva come
eren i fioeu l’aveva capii tusscòss e ’l m’ha daa on
alter appontament per el lunedì dòpo. Ma quell lunedì
dòpo mè pader el moeur in d’on incident.
Fine del (probabile?) futuro come voce bianca. Parli
del 1937 quand nò gh’eren anmò tutti programma per
i fioeu come gh’hinn per quei del dì d’incoeu. Numm
gh’avevom la radio, l’era staa el regal de mè pader a
la mia mama quand in ’sto mond (faa domà per quei
nassuu con la camisa) l’è rivada lee, la mia sorella piscinina.
Ona radio Marelli Alcor de lusso cont el fono:
se podeva scoltaa el giradischi senza girà la manovella.
Lire 1.000, tòlta a rate naturalment (50 lira al mes)
e la fonziona ancamò.
12 Sciroeu de Milan - Marz/April 2013
SCIROEU DE LA PRÒSA
Il Direttore
Con la radio in cà emm faa a la svelta a imparà tòcch
de òpera, canzon e operett che poeu cantavom per
nòster cunt. Quej ch’hinn on poo avanti cont i ann se
regòrdarann senz’alter che quij dònn e quij òmen, che
dòpo la guerra e anca prima, giraven per i cortil cont
el megafono in man a cantà operett e canzon e anca
on quai tòcch d’òpera. Da i part de la Baròna in doe
stavi de cà, rivava on òmm che ’l cantava on poo de
tutt e devi dì che ’l cantava anca ben, però quand che
’l taccava la romanza “Mattinata” del Leoncavall, el
sbagliava semper el final.
Mia mama che la gh’aveva per la musica on’oreggia
che mòllala, quand la sentiva el final de la romanza la
gh’aveva i cavei bei drizz in pee.
On dì, stracca de sentì quell là borlà dent al sòlit sbali,
la scriv on bigliett, la gh’ha involtiaa dent ona moneda
e la me manda giò a portaghel. El bigliett el diseva:
“perché sbagliate sempre il finale? Non termina così
il brano”.
El cantant leg el bigliett poeu da òmm de spirit el ciappa
on tòcchel de lapis e su l’altra facciada del bigliett
el scriv: “Perché non venite voi a farmi sentire il finale?”.
Mia mader, dònna de spirit anca lee la va giò e
con la soa bella vos l’improvvisa sul moment el final
giust.
L’òmm l’è restaa lì ’me on looch e poeu ancamò mezz
imbesuii el tira foeura de saccòccia la moneda che la
mia mama la gh’aveva mandaa giò ghe le da indree e el
ghe dis: “Grazie, da voi non posso accettare denaro.”
In seguit quand che ’l tornava a cantà “Mattinata” el
final l’era quell che l’aveva cantaa la mia mama.
Dio! Che vite sprecate! Ci fosse stato un pizzico di
buona sorte... solo un pizzico.